Šibenik
Šibenik (bil-Kroat: [ʃîbeniːk] ⓘ), magħrufa storikament bħala Sebenico (bit-Taljan: [sebeˈniːko]), hija belt storika fil-Kroazja, li tinsab fid-Dalmazja ċentrali, fejn ix-xmara Krka tnixxi fil-Baħar Adrijatiku. Šibenik hija ċentru politiku, edukattiv, tat-trasport, industrijali u turistiku tal-Kontea ta' Šibenik-Knin, u hija wkoll it-tielet l-ikbar belt fir-reġjun tad-Dalmazja. Mill-2011, il-belt għandha 34,302 abitanti, filwaqt li l-muniċipalità għandha 46,332 abitant.[1]
| Šibenik | |||
|---|---|---|---|
 Kroazja | |||
 | |||
| |||
| Amministrazzjoni | |||
| Stat sovran | Kroazja | ||
| County of Croatia | Kontea ta' Šibenik-Knin | ||
| Kap tal-Gvern |
Željko Burić (en)  | ||
| Isem uffiċjali | Šibenik | ||
| Ismijiet oriġinali | Šibenik | ||
| Kodiċi postali |
22 000 | ||
| Ġeografija | |||
| Koordinati | 43°44′02″N 15°53′44″E / 43.7339°N 15.8956°EKoordinati: 43°44′02″N 15°53′44″E / 43.7339°N 15.8956°E | ||
  Šibenik Šibenik (Croatia) | |||
| Superfiċjenti | 399.5 kilometru kwadru, 44.1 kilometru kwadru | ||
| Għoli | 0 m | ||
| Demografija | |||
| Popolazzjoni | 42,599 abitanti (31 Awwissu 2021) | ||
| Informazzjoni oħra | |||
| Fondazzjoni | 860s | ||
| Kodiċi tat-telefon |
022 | ||
| Żona tal-Ħin | Ħin tal-Ewropa Ċentrali | ||
| bliet ġemellati | Civitanova Marche, San Benedetto del Tronto, Voiron, Sinju Humenné | ||
| sibenik.hr | |||
Storja immodifika
Etimoloġija immodifika
Jeżistu diversi interpretazzjonijiet dwar isem Šibenik. Fil-ktieb tiegħu tas-seklu 15 De situ Illiriae et civitate Sibenici, Juraj Šižgorić jiddeskrivi l-isem u l-pożizzjoni ta' Šibenik. Huwa jattribwixxi l-oriġini ta' isem il-belt għall-fatt li hija mdawra minn palizzati magħmula minn šibe (stikek, bis-singular šiba). Interpretazzjoni oħra hija assoċjata mal-foresta permezz tat-toponimu Latin "Sibinicum", li kien ikopri mikroreġjun idjaq fi ħdan Šibenik fl-inħawi tal-Fortizza ta' San Mikiel.
Storja bikrija immodifika
Għad-differenza ta' bliet oħra tul il-kosta Adrijatika, li ġew stabbiliti mill-Griegi, mill-Illiri u mir-Rumani, Šibenik ġiet stabbilita mill-Kroati. Mill-iskavi tal-Kastell ta' San Mikiel ħareġ fid-dieher li s-sit kien ilu abitat ferm qabel il-wasla effettiva tal-Kroati. Issemmiet għall-ewwel darba bl-isem attwali fl-1066 f'Karta tar-Re Kroat Petar Krešimir IV u għal xi żmien kienet is-sede ta' dan ir-re Kroat. Għal dik ir-raġuni, Šibenik tissejjaħ ukoll "Krešimirov grad" (il-belt ta' Krešimir).
Bejn is-sekli 11 u 12, Šibenik għaddiet minn qawwa għall-oħra bejn Venezja, Biżanzju u l-Ungerija. Inħakmet mir-Repubblika ta' Venezja fl-1116, li kellha l-kontroll tagħha sal-1124, meta mbagħad tilfitha għal żmien qasir kontra l-Imperu Biżantin, u mbagħad reġgħet kisbet il-kontroll tagħha sal-1133 meta reġgħet ittieħdet mir-Renju tal-Ungerija. Imbagħad baqgħet tgħaddi minn qawwa għall-oħra diversi drabi oħra sal-1180.
Il-belt ingħatat l-istatus ta' belt fl-1167 mingħand Stiefnu III tal-Ungerija. Kisbet id-djoċesi tagħha stess fl-1298.
Taħt Venezja u l-Asburgi immodifika
Il-belt, bħall-kumplament tad-Dalmazja, inizjalment irreżistiet kontra r-Repubblika Venezjana, iżda kellha ċċedi wara gwerra ta' tliet snin fl-1412. Taħt it-tmexxija Venezjana, Šibenik fl-1412 saret is-sede prinċipali tad-dwana u s-sede tal-uffiċċju tal-konsumaturi tal-melħ b'monopolju fil-kummerċ tal-melħ fi Chioggia u fil-Baħar Adrijatiku kollu.
F'Awwissu 1417, l-awtoritajiet Venezjani kienu mħassba minħabba l-Morlaki u Slavi oħra mill-periferiji, li kienu theddida għas-sigurtà f'Šibenik. L-Imperu Ottoman beda jheddid lil Šibenik (magħrufa bħala Sebenico), bħala parti mit-taqbida tiegħu kontra Venezja, fl-aħħar tas-seklu 15, iżda qatt ma rnexxielu jaħkimha. Fis-seklu 16 inbniet il-Fortizza ta' San Nikola, u sas-seklu 17 il-fortifikazzjonijiet tagħha reġgħu ġew imtejba bil-fortizzi ta' San Ġwann (f'Tanaja) u ta' Šubićevac (f'Barone).
Il-Morlaki bdew jinsedjaw Šibenik matul il-Gwerra ta' Kreta (1645–1669).
Il-waqgħa tar-Repubblika ta' Venezja fl-1797 wasslet biex Sebenico taqa' taħt l-awtorità tal-monarkija tal-Asburgi.
Wara l-Kungress ta' Vjenna sal-1918, il-belt (reġgħet) saret parti mill-monarkija Awstrijaka (in-naħa tal-Awstrija wara l-kompromess tal-1867), kap tad-distrett bl-istess isem, u wieħed mit-13-il Bezirkshauptmannschaften fir-Renju tad-Dalmazja. L-isem Taljan Sebenico baqa' jintuża biss sal-ħabta tal-1871.
Fl-1872, fi żmien ir-Renju tad-Dalmazja, Ante Šupuk sar l-ewwel sindku Kroat tal-belt li ġie elett b'suffraġju universali. Huwa kien strumentali fil-proċess ta' mmodernizzar tal-belt, u huwa mfakkar b'mod partikolari għall-proġett tal-1895 biex it-toroq tal-belt jiddawlu permezz tal-Impjant Idroelettriku bikri ta' AC Jaruga. Fit-28 ta' Awwissu 1895, Šibenik saret l-ewwel belt fid-dinja b'tidwil tat-toroq b'kurrent alternat.
Seklu 20 immodifika
Matul l-Ewwel Gwerra Dinjija, il-flotta navali tal-Awstrija u tal-Ungerija użat il-faċilitajiet tal-port tal-belt, u l-bastimenti militari li ħarbu l-forza tal-Alleati wara l-battalja tal-Kap ta' Rodoni (jew Gargano) sabu l-kenn hemmhekk, fejn kienu bbażati xi bastimenti militari oħra. Wara l-gwerra Šibenik ġiet okkupata mir-Renju tal-Italja sat-12 ta' Ġunju 1921. Bħala riżultat tat-Trattat ta' Rapallo, it-Taljani ċedew il-belt u saret parti mir-Renju tas-Serbi, Kroati u Sloveni. Wara l-Ewwel Gwerra Dinjija, beda l-eżodu tat-Taljani tad-Dalmazja mill-belt. Matul it-Tieni Gwerra Dinjija, Šibenik ġiet annessa mill-Italja u saret parti mill-Governorat Taljan tad-Dalmazja mill-1941 sal-1943 u parti mill-provinċja ta' Zara. Il-partiġjani Komunisti ħelsu lil Šibenik fit-3 ta' Novembru 1944.
Wara t-Tieni Gwerra Dinjija, il-belt saret parti mill-SFR Jugoslavja sa ma l-Kroazja ddikjarat l-indipendenza fl-1991.
Matul il-Gwerra tal-Indipendenza Kroata (1991–1995), Šibenik ġiet attakkata bil-kbir mill-Armata Popolari tal-Jugoslavja u mit-truppi paramilitari Serbi. Għalkemm kellha inqas armi, l-armata Kroata naxxenti u l-poplu ta' Šibenik irnexxielhom jiddefendu l-belt. Il-battalja damet sitt ijiem (mis-16 sat-22 ta' Settembru), u spiss tissejjaħ bħala "l-battalja ta' Settembru". Il-bombi ġarrbu ħsarat lil bosta binjiet u monumenti, inkluż il-koppla tal-Katidral ta' San Ġakbu ta' Šibenik u t-teatru li kien inbena fl-1870.
F'operazzjoni militari ta' Awwissu 1995, l-Armata Kroata għelbet lill-forzi Serbi u reġgħet kisbet il-kontroll taż-żoni okkupati, u b'hekk ir-reġjun irnexxielu jirkupra mill-gwerra u baqa' jiżviluppa bħala ċ-ċentru tal-kontea ta' Šibenik-Knin. Minn dak iż-żmien 'l hawn, iż-żoni tal-belt li kienu ġarrbu xi ħsarat ġew irrestawrati għalkollox.
Klima immodifika
Šibenik għandha klima Mediterranja (Csa), bi xtiewi umdużi u miti u bi sjuf nexfin. Jannar u Frar huma l-iksaħ xhur, filwaqt li Lulju u Awwissu huma l-iżjed xhur sħan. F'Lulju t-temperatura massima medja tkun madwar 30 °C (86 °F). Is-subtip tal-Klassifikazzjoni Klimatika ta' Köppen għal din il-klima hu "Csa" (Klima Mediterranja).
| Data klimatika għal Šibenik | |||||||||||||
|---|---|---|---|---|---|---|---|---|---|---|---|---|---|
| Xahar | Jan | Fra | Mar | Apr | Mej | Ġun | Lul | Aww | Set | Ott | Nov | Diċ | Sena |
| Temp. għolja rekord f'°C (°F) | 21.4
(70.5) |
22.7
(72.9) |
26.2
(79.2) |
28.8
(83.8) |
34.0
(93.2) |
37.6
(99.7) |
38.2
(100.8) |
39.4
(102.9) |
35.4
(95.7) |
30.3
(86.5) |
28.4
(83.1) |
20.3
(68.5) |
39.4
(102.9) |
| Temp. għolja medja f'°C (°F) | 6.8
(44.2) |
7.4
(45.3) |
10.0
(50.0) |
13.6
(56.5) |
18.4
(65.1) |
22.2
(72.0) |
25.0
(77.0) |
24.6
(76.3) |
20.6
(69.1) |
16.3
(61.3) |
11.7
(53.1) |
8.2
(46.8) |
15.4
(59.7) |
| Temp. baxxa rekord f'°C (°F) | −10.2
(13.6) |
−11.0
(12.2) |
−7.5
(18.5) |
−0.5
(31.1) |
2.3
(36.1) |
8.3
(46.9) |
11.6
(52.9) |
10.2
(50.4) |
6.9
(44.4) |
2.1
(35.8) |
−6.6
(20.1) |
−8.9
(16.0) |
−11.0
(12.2) |
| Preċipitazzjoni medja f'mm (pulzieri) | 74.1
(2.92) |
60.1
(2.37) |
62.0
(2.44) |
62.7
(2.47) |
49.0
(1.93) |
53.0
(2.09) |
29.7
(1.17) |
44.9
(1.77) |
75.5
(2.97) |
82.7
(3.26) |
112.4
(4.43) |
95.2
(3.75) |
801.3
(31.57) |
| Medja ta' jiem bix-xita | 10 | 9 | 9 | 10 | 9 | 8 | 5 | 5 | 7 | 9 | 12 | 12 | 105 |
| Medja ta' jiem bil-borra | 1 | 1 | 0 | 0 | 0 | 0 | 0 | 0 | 0 | 0 | 0 | 1 | 3 |
| Medja ta' sigħat ta' xemx fix-xahar | 128.6 | 150.6 | 196.1 | 222.4 | 286.3 | 312.1 | 358.0 | 326.0 | 254.3 | 199.7 | 131.0 | 113.8 | 2,678.9 |
| Sors: is-Servizz Meteoroloġiku u Idroloġiku Nazzjonali tal-Kroazja.[2] | |||||||||||||
Attrazzjonijiet ewlenin immodifika
Il-knisja ċentrali ta' Šibenik, il-Katidral ta' San Ġakbu, hija elenkata bħala Sit ta' Wirt Dinji tal-UNESCO.
Diversi arkitetti suċċessivi bnewha kompletament bil-ġebel bejn l-1431 u l-1536, bi stil Gotiku kif ukoll Rinaxximentali. Iċ-ċnagen tal-ġebel li jidħlu f'xulxin tal-bejt tal-katidral ġarrbu xi ħsarat meta l-belt ġiet ibbumbardjata mill-qawwiet tal-Jugoslavja fl-1991. Minn dak iż-żmien 'l hawn saru t-tiswijiet meħtieġa.
.jpg)
Fortifikazzjonijiet f'Šibenik immodifika
| Katidral ta' San Ġakbu | |
|---|---|
| Pożizzjoni | Šibenik, il-Kroazja |
| Inbena | 1431-1536 |
| Stil arkitettoniku | Rinaxximent |
| Sit ta' Wirt Dinji tal-UNESCO | |
| Tip | Kulturali |
| Kriterji | i, ii, iv |
| Deżinjazzjoni | 2000 (l-24 Sessjoni) |
| Nru ta' Referenza | 963 |
| Reġjun | Ewropa u l-Amerka ta' Fuq |
| Fortizza ta' San Nikola | |
|---|---|
| Pożizzjoni | Šibenik, il-Kroazja |
| Sit ta' Wirt Dinji tal-UNESCO | |
| Tip | Kulturali |
| Kriterji | iii, iv |
| Deżinjazzjoni | 2017 (il-41 Sessjoni) |
| Parti minn | Opri Venezjani tad-Difiża bejn is-sekli 15 u 17: Stato da Terra – Stato da Mar tal-Punent |
| Nru ta' Referenza | 1533 |
| Reġjun | Ewropa u l-Amerka ta' Fuq |
Fil-belt ta' Šibenik hemm erba' fortizzi, u kull waħda għandha veduti tal-belt, tal-baħar u tal-gżejjer fil-qrib. Il-fortizzi issa huma destinazzjonijiet turistiċi:
- il-Fortizza ta' San Nikola (bil-Kroat: Tvrđava Sv. Nikole) hija fortizza li tinsab fil-gżira ta' Ljuljevac, fid-daħla tal-Fliegu ta' Sant'Antnin, faċċata tal-fanal tal-bajja ta' Jadrija. Ġiet inkluża fil-lista tas-Siti ta' Wirt Dinji tal-UNESCO bħala parti mill-Opri Venezjani tad-Difiża bejn is-sekli 15 u 17: Stato da Terra – Stato da Mar tal-Punent fl-2017;
- il-Fortizza ta' San Mikiel fiċ-ċentru storiku tal-belt;
- il-Fortizza ta' San Ġwann;
- il-Fortizza ta' Barone.
Wirt naturali immodifika
- Madwar 18-il kilometru (11-il mil) fit-Tramuntana tal-belt hemm il-Park Nazzjonali ta' Krka, li huwa simili għall-Park Nazzjonali tal-Lagi ta' Plitvice, u huwa magħruf għall-bosta kaskati, flora, fawna, u fdalijiet storiċi u arkeoloġiċi.
- L-arċipelagu ta' Kornati, fil-Punent ta' Šibenik, jikkonsisti minn 150 gżira f'erja tal-baħar ta' madwar 320 km2 (124 mil kwadru), u b'hekk huwa l-iżjed arċipelagu dens fil-Baħar Mediterran.
Kultura immodifika
Il-kompożitur Jakov Gotovac stabbilixxa s-Soċjetà Filarmonika tal-belt fl-1922. Il-kompożitur tas-seklu 19 Franz von Suppé kien parti min-nisġa kulturali tal-belt, peress li twieled fi Split fil-qrib.
Kull sajf isiru għadd ta' kunċerti u avvenimenti fil-belt, bosta minnhom fil-Fortizza ta' San Mikiel. Mill-2016 ukoll beda jittella' festival annwali tal-mużika, tal-arti u tas-saħħa fil-gżira ta' Obonjan fil-qrib (6 kilometri (3.7 mili) fil-Lbiċ tal-belt).
Il-Festival Internazzjonali tat-Tfal ta' Šibenik (Međunarodni Dječji Festival) isir kull sajf u jospita workshops għat-tfal, reċti u attivitajiet oħra. Mill-2011 sal-2013 ittella' l-Festival ta' Terraneo (festival tal-mużika) f'Awwissu ta' kull sena f'eks żona militari f'Šibenik, u mill-2014 Šibenik u bliet oħra fil-qrib bdew jospitaw is-suċċessur spiritwali, il-Festival ta' Super Uho. Šibenik tospita wkoll il-festival tal-Lejliet tal-Kanzunetta tad-Dalmazja (Večeri Dalmatinske Šansone), fit-tieni nofs ta' Awwissu.
Sport immodifika
Bħala belt sportiva famuża, Šibenik hija l-belt tat-twelid ta' bosta atleti ta' suċċess: Aleksandar Petrović, Dražen Petrović, Perica Bukić, Ivica Žurić, Predrag Šarić, Dario Šarić, Vanda Baranović-Urukalo, Danira Nakić, Nik Slavica, Miro Bilan, Dražan Jerković, Petar Nadoveza, Krasnodar Rora, Dean Računica, Mladen Pralija, Ante Rukavina, Duje Ćaleta-Car, Mile Nakić, Franko Nakić, Siniša Belamarić, Renato Vrbičić, Ivica Tucak, Andrija Komadina, Miro Jurić, Antonio Petković, Neven Spahija, Antonija Sandrić, Mate Maleš, Stipe Bralić, Franco Jelovčić, Nives Radić, Karmela Makelja, u bosta oħrajn.
Basketball immodifika
Il-Kumpless Sportiv ta' Baldekin kien il-kumpless ewlieni ta' KK Šibenik, il-klabb famuż tal-basketball li lagħab il-finali tat-Tazza Korać tal-FIBA darbtejn, kif ukoll il-finali tal-kampjonat Jugoslav tal-1982–1983. It-tim kien immexxi minn Dražen Petrović li dak iż-żmien kellu 19-il sena.
Il-klabb tal-basketball tan-nisa, ŽKK Šibenik, huwa fost l-iżjed klabb tal-basketball tan-nisa ta' suċċess fil-Kroazja, u rebaħ il-kampjonat Jugoslav fl-1991, it-Tazza Jugoslava darbtejn, il-kampjonat Kroat erba' darbiet, it-Tazza Kroata erba' darbiet, il-kampjonat Adrijatiku ħames darbiet, u t-Tazza ta' Vojko Herksel erba' darbiet.
Il-klabb tal-basketball tal-irġiel, Jolly Jadranska banka, li issa ġie xolt, lagħab fis-semifinali tal-play-offs tal-kampjonat Kroat darbtejn, kif ukoll fil-finali tat-Tazza ta' Krešimir Ćosić fl-istaġun tal-2016–2017.
L-ikbar suċċess ta' GKK Šibenka, klabb li ġie stabbilit fl-2010 wara li ġie xolt il-klabb famuż ta' KK Šibenik, wasal fl-istaġun tal-kampjonat Kroat tal-2016–2017, meta l-klabb lagħab is-semifinali tal-play-offs kontra t-tim qawwi ta' Cibona Żagreb. GKK Šibenka tilfu kontra Cibona Żagreb fis-semifinali.
Futbol immodifika
Il-grawnd ta' Šubićevac, li jinsab fil-kwartier bl-istess isem, ilu l-grawnd ewlieni tal-klabb tal-futbol HNK Šibenik, li kien lagħab għal bosta snin fit-Tieni Kampjonat Jugoslav, u iktar 'il quddiem għal bosta snin fl-Ewwel Kampjonat Kroat. Fl-istaġun tal-2009–2010, il-klabb lagħab fil-finali tat-Tazza Kroata, u tilef kontra t-tim qawwi Hajduk Split. Mill-2021, il-klabb reġa' qed jikkompeti fl-Ewwel Kampjonat Kroat.
Water polo immodifika
Il-klabb tal-water polo, VK Šibenik, li issa ġie xolt, jitqies bħala wieħed mill-aqwa klabbs tal-water polo tal-irġiel fl-eks Jugoslavja, u wasal fit-tieni post fil-kampjonat domestiku tal-1986–1987. Il-klabb lagħab ukoll fil-finali tat-Tazza Ewropea LEN tal-istaġun tal-2006–2007, iżda tilfu kontra Sintez Kazan. Barra minn hekk, il-klabb lagħab fit-Tornew LEN tal-2008–2009, immexxi darbtejn minn Ivica Tucak, illum il-ġurnata l-kowċ ewlieni tat-tim nazzjonali Kroat tal-irġiel.
Il-plejers internazzjonali Kroati tal-water polo, Perica Bukić u Renato Vrbičić, huma rebbieħ ta' medalji tal-Logħob Olimpiku. Huma rebħu medalji tad-deheb fil-Logħob Olimpiku tas-Sajf tal-1996 f'Atlanta. Ivica Tucak kienet l-iżjed kowċ ta' suċċess tat-tim nazzjonali Kroat tal-irġiel.
Demografija immodifika
| Sena | Pop. | ±% |
|---|---|---|
| 1961 | 44,440 | — |
| 1971 | 47,122 | +6.0% |
| 1981 | 51,445 | +9.2% |
| 1991 | 55,842 | +8.5% |
| 2001 | 51,553 | −7.7% |
| 2011 | 46,332 | −10.1% |
| Sors: Naselja i stanovništvo Republike Hrvatske 1857–2001, DZS, Żagreb, 2005 | ||
Fiċ-ċensiment Kroat tal-2011, il-popolazzjoni totali tal-belt ta' Šibenik kienet tammonta għal 46,332 ruħ, u b'hekk hija l-għaxar l-ikbar belt fil-Kroazja, b'34,302 abitanti fl-insedjament urban.
Miċ-ċittadini ta' Šibenik, 94.02 % kienet Kroati etniċi.
Il-lista ta' insedjament hija kif ġej:
- Boraja, popolazzjoni ta' 249 ruħ;
- Brnjica, popolazzjoni ta' 72 ruħ;
- Brodarica, popolazzjoni ta' 2,534 ruħ;
- Čvrljevo, popolazzjoni ta' 64 ruħ;
- Danilo, popolazzjoni ta' 376 ruħ;
- Danilo Biranj, popolazzjoni ta' 442 ruħ;
- Danilo Kraljice, popolazzjoni ta' 104 ruħ;
- Donje Polje, popolazzjoni ta' 267 ruħ;
- Dubrava kod Šibenika, popolazzjoni ta' 1,185 ruħ;
- Goriš, popolazzjoni ta' 147 ruħ;
- Gradina, popolazzjoni ta' 303 ruħ;
- Grebaštica, popolazzjoni ta' 937 ruħ;
- Jadrtovac, popolazzjoni ta' 171 ruħ;
- Kaprije, popolazzjoni ta' 189 ruħ;
- Konjevrate, popolazzjoni ta' 173 ruħ;
- Krapanj, popolazzjoni ta' 170 ruħ;
- Lepenica, popolazzjoni ta' 68 ruħ;
- Lozovac, popolazzjoni ta' 368 ruħ;
- Mravnica, popolazzjoni ta' 70 ruħ;
- Perković, popolazzjoni ta' 111-il ruħ;
- Podine, popolazzjoni ta' 26 ruħ;
- Radonić, popolazzjoni ta' 79 ruħ;
- Raslina, popolazzjoni ta' 567 ruħ;
- Sitno Donje, popolazzjoni ta' 561 ruħ;
- Slivno, popolazzjoni ta' 110 ruħ;
- Šibenik, popolazzjoni ta' 34,302 ruħ;
- Vrpolje, popolazzjoni ta' 776 ruħ;
- Vrsno, popolazzjoni ta' 67 ruħ;
- Zaton, popolazzjoni ta' 978 ruħ;
- Zlarin, popolazzjoni ta' 284
- Žaborić, popolazzjoni ta' 479 ruħ;
- Žirje, popolazzjoni ta' 103 ruħ.
Ekonomija immodifika
Port immodifika
Šibenik għandha wieħed mill-iżjed portijiet protetti fil-kosta Adrijatika Kroata u l-port jinsab fl-estwarju tax-xmara Krka. Il-kanal tal-approċċ huwa navigabbli minn vapuri b'piż mejjet sa 50,000 tunnellata. Il-port innifsu huwa fond sa 40 metru.
Trasport immodifika
Šibenik għandha stazzjon ferrovjarju li huwa venda tal-linja ferrovjarja lokali ta' bejn Perković u Šibenik, li hija fergħa tal-linja ferrovjarja M604 li tikkollega lil Żagreb u lil Split permezz ta' Knin. Is-servizzi ferrovjarji huma operati mil-Linji Ferrovjarji Kroati.
Il-venda tal-karozzi tal-linja ta' Šibenik hija kkollegat mal-linji ta' kuljum tal-karozzi tal-linja li joperaw lejn il-bliet tal-madwar bħal Vodice, Pirovac u Biograd na Moru. Hemm kollegamenti tajbin lejn il-bliet ewlenin fil-Kroazja kollha: Rijeka, Crikvenica, Żagreb, Osijek, Zadar, Split, Makarska u Dubrovnik.
Ġemellaġġi immodifika
Šibenik hija ġemellata ma':
- Civitanova Marche (mill-2002);
- San Benedetto del Tronto;
- Kreis Herford;
- Voiron;
- Vukovar (mill-2011);
- Pineto (mill-2016);
- Razlog (mill-2016);
- Veszprém.
Gallerija immodifika
.jpg)
Referenzi immodifika
- ^ "Central Bureau of Statistics". web.dzs.hr. Miġbur 2024-04-18.
- ^ "DHMZ". klima.hr. Miġbur 2024-04-18.