Kampjonati Ewropej tal-Futbol 2012

Il-Kampjonati Ewropej tal-Futbol 2012, magħrufin sempliċement bħala Euro 2012, kienu l-erbatax-il edizzjoni tal-Kampjonati Ewropej, kompetizzjoni dedikata għat-timijiet nazzjonali tal-futbol tal-UEFA. Il-fażi finali tat-turnew saret ġewwa l-Polonja u l-Ukrajna bejn it-8 ta' Ġunju u l-1 ta' Lulju 2012.

Kampjonati Ewropej tal-Futbol 2012

(PL) Mistrzostwa Europy w Piłce Nożnej 2012 (UK) Чемпіонат Європи з футболу 2012
Dettalji tal-kompetizzjoni
Pajjiż ospitanti	Polonja Ukrajna
Dati	8 ta' Ġunju – 1 ta' Lulju
Parteċipanti	16 (minn konfederazzjoni waħda)
Grawnds	8 (f'8 ibliet ospitanti)
Pożizzjonijiet finali
Rebbieħ	Spanja (it-3 titlu)
It-Tieni post	Italja
Statistika tal-kompetizzjoni
Partiti	31
Gowls skorjati	76 (2.45 kull logħba)
Attendenza	1,440,896 (46,481 kull logħba)
L-aqwa skorer(s)	Fernando Torres (3)
← 2008 2016 →

Arloġġ ġewwa Lviv, fl-Ukrajna, juri l-ġranet li għad baqa' għall-bidu tal-kompetizzjoni

Din kienet l-aħħar darba li l-fażi finali rat il-parteċipazzjoni ta' 16-il pajjiż, fejn għall-edizzjoni tal-2016 hu previst li n-numru ta' parteċipanti jiġi estiż għal 24. Il-fażi ta' kwalifikazzjoni saret bejn Awwissu 2010 u Novembru 2011.

Fil-finali li saret ġewwa l-Olympic Stadium ta' Kjiv (l-Ukrajna), Spanja rebħu l-kompetizzjoni bl-iskor ta' 4–0 kontra l-Italja. B'din ir-rebħa Spanja saru l-ewwel tim li rebħu żewġ edizzjonijiet konsekuttivi tal-Kampjonati tal-Euro, u l-ewwel tim nazzjonali Ewropew li rebaħ tliet titli internazzjonali infila, li jinkludu l-Euro 2008 u t-Tazza tad-Dinja 2010. Minħabba li Spanja kienu diġà ggwadanjaw l-aċċess għat-Tazza tal-Konfederazzjonijiet 2013 wara t-trijonf fit-Tazza tad-Dinja, l-Italja ikkwalifikat.

L-għażla tal-organizzatur

Offerti

Għall-bidu, l-organizzazzjoni ta' dan l-avveniment kienet bejn ħames offerti minn seba' pajjiżi: Kroazja–Ungerija (ma' xulxin), il-Greċja, l-Italja, Polonja–Ukrajna (ma' xulxin), u t-Turkija.

Nhar it-8 ta' Novembru, 2005, il-Kumitat Eżekuttiv tal-UEFA naqqas il-lista tal-kandidati għal tlieta:

Pajjiż	Voti
Italja	11
Kroazja / Ungerija	9
Polonja / Ukrajna	7
Turkija	6
Greċja	2

Fil-31 ta' Mejju 2006, it-tliet offerti komplew it-tieni fażi tal-proċess billi bagħtu iktar dossiers dettaljati. F'Settembru tal-2006, il-UEFA wettqet żjarat fuq is-siti tal-pajjiżi kandidati. L-offerta ta' Polonja–Ukrajna ġiet magħżula b'votazzjoni mill-Kumitat Eżekuttiv tal-UEFA waqt laqgħa ġewwa Cardiff nhar it-18 ta' April 2007. B'hekk din saret it-tielet darba li żewġ pajjiżi ospitaw il-Kampjonati Ewropej, wara Belġju–Pajjiżi l-Baxxi (2000) u Awstrija–Żvizzera (2008). Ir-riżultati tal-votazzjoni kienu hekk:

Pajjiż	Voti
Polonja / Ukrajna	8
Italja	4
Kroazja / Ungerija	0

Proċedura tal-votazzjoni

Il-votazzjoni kellha ssir f'massimu ta' żewġ rawnds. Sabiex il-vot ikun validu, kellu jkun hemm kworum fil-kamra tal-laqgħat, jiġifieri, mill-inqas tmien membri tal-Kumitat, esklużi l-president u d-deputat li ma kellhomx id-dritt il-vot. Fl-ewwel rawnd, kull membru kellu vot wieħed. Minħabba li l-offerta tal-Polonja u l-Ukrajna kisbet maġġoranza assoluta ta' tmien voti, din tħabbret bħala r-rebbieħa u ma kienx hemm bżonn li jsir it-tieni rawnd.

Il-votazzjoni saret mill-membri tal-Kumitat Eżekuttiv tal-UEFA kompost minn 14-il membru:

1. Michel Platini – President
2. Senes Erzik
3. Geoffrey Thompson
4. Angel María Villar Llona
5. Gerhard Mayer-Volferder
6. Marios N. Lefkaritis
7. Franco Carraro
8. Vjačeslav Koloskov
9. Gilberto Madaíl
10. Joseph Mifsud
11. Per Ravn Omdal
12. Mircea Sandu
13. Mathieu Sprengers
14. Grigoryi Surkis

La Carraro u lanqas Surkis ma setgħu jivvutaw fl-ebda votazzjoni, minħabba li kienu rappreżentati ta' pajjiżi kandidati. Din ħalliet tnax-il vot disponibbli għat-tliet offerti.

Stadji

Il-lista tat-tmient ibliet li se jospitaw il-partita tal-Euro 2012 ġiet uffiċjalizzata mill-UEFA f'laqgħa ġewwa Bukarest nhar l-14 ta' Mejju 2009, fejn kull grupp se jibbaża ruħu fuq żewġ grawnds kull wieħed.

Il-bliet ospiti ta' Varsavja, Gdańsk, Wrocław, Poznań, Kjiv u Lviv huma kollha mkejjen turistiċi popolari, bil-kontra ta' Donetsk u Kharkiv (tal-aħħar ħadet post lil Dnipropetrovsk bħala belt ospitu fl-2009).

Polonja
Varsavja	Gdańsk	Wrocław	Poznań
Stadion Narodowy Postijiet: 56,070	PGE Arena Postijiet: 39,150	Stadion Miejski Postijiet: 40,000	Municipal Stadium Postijiet: 39,550
Wrocław Kjiv Lviv Donetsk Varsavja Gdańsk Kharkiv Poznań
Ukrajna
Kjiv	Donetsk	Kharkiv	Lviv
Olympic Stadium Postijiet: 64,640	Donbass Arena Postijiet: 49,400	Metalist Stadium Postijiet: 37,750	Arena Lviv Postijiet: 32,990

Kwalifikazzjoni

Biex tapprofondixxi, ara l-artiklu: Kwalifikazzjoni għall-Kampjonati Ewropej tal-Futbol 2012.

It-tim nazzjonali Irlandiż jiċċelebra l-kwalifikazzjoni wara t-trijonf fil-play-offs kontra l-Estonja

It-tlugħ tal-poloz għall-partiti tal-fażi ta' kwalifikazzjoni għall-Euro 2012 saru ġewwa Varsavja fis-7 ta' Frar 2010. 51 tim daħlu jikkompetu għal 14-il post fil-fażi finali, flimkien mal-Polonja u l-Ukrajna. Dawn it-timijiet ġew maqsuma f'disa' gruppi, bil-polza taqsamhom skont il-koeffiċjenti tat-timijiet nazzjonali tal-UEFA.

Ir-rawnd ta' kwalifikazzjoni bdiet f'Awwissu tal-2010 u tlestiet f'Novembru 2011. Fi tmiem il-fażi tal-gruppi f'Ottubru 2011, id-disa' rebbieħa tal-gruppi għaddew awtomatikament għall-finali, bl-aqwa tim li spiċċa fit-tieni post jagħmel dan ukoll. It-tmien timijiet l-oħra li temmew fit-tieni post affrontaw lil xulxin fi play-off ta' żewġ legs, bir-rebbieħa jaqtgħu passaġġ għall-finali.

Timijiet parteċipanti

Il-fażi finali tal-kompetizzjoni se tara sittax-il tim nazzjonali, format li ilu jiġi adottat mill-1996. Ċerti assoċjazzjonijiet tal-futbol Ewropej ipproponew li dan jiġi estiż għal 24 tim, minkejja li n-numru ta' membri tal-UEFA ftit li xejn kiber minn mindu saret l-aħħar estensjoni fl-1996 (53 f'April tal-2006 ikkumparat ma' 48 fl-Euro 1996). F'April tal-2007, il-Kumitat Eżekuttiv tal-UEFA iddeċieda kontra l-estensjoni għall-2012.

Għal dawn il-kampjonati, tnax-il finalist ħadu sehem fl-edizzjoni preċedenti tal-2008, bl-Ingilterra u d-Danimarka jirritornaw wara l-2004. Ir-Repubblika tal-Irlanda rritornat wara assenza ta' 24 sena għat-tieni dehra tagħhom f'fażi finali tal-kompetizzjoni. Waħda mill-ospiti, l-Ukrajna, iddebuttat bħala pajjiż indipendenti wara r-rebħ tal-edizzjoni inawgurali tal-1960 bħala parti mill-Unjoni Sovjetika.

Ħoloq esterni

• Sit uffiċjali
• Aħbarijiet tal-Euro 2012 mill-Ukrajna