Palazz ta' Ishak Paşa

Il-Palazz ta' Ishak Paşa (bit-Tork: İshak Paşa Sarayı) huwa palazz u kumpless amministrattiv nofs irvinat li jinsab fid-distrett ta' Doğubeyazıt tal-provinċja ta' Ağrı fil-Lvant tat-Turkija.

Il-Palazz ta' Ishak Paşa.

Il-Palazz ta' Ishak Paşa huwa palazz ta' żmien l-Ottomani u l-kostruzzjoni tiegħu nbdiet fl-1685 mill-bey tal-provinċja ta' Beyazit, Colak Abdi Paşa taċ-Cildirogullari, li kienet familja ta' Paxà ereditarji marbuta mal-familja Jaqeli. Il-kostruzzjoni tkompliet minn Ishak Paşa, dixxendent ta' Abdi Paşa. Il-palazz ingħata ismu u huwa sar il-Paxà ta' Çıldır mill-1790 sal-1791. Skont il-kitba mnaqqxa mad-daħla tal-palazz, is-sezzjoni tal-Ħarem tal-palazz tlestiet minn Ishak (Iżakk) Paşa fl-1784.

Il-Palazz ta' Ishak Paşa huwa wieħed mill-ftit eżempji ta' palazzi Torok li għadu jeżisti.

Il-palazz intuża fuq in-naħa ta' wara tal-karta tal-flus Torka l-ġdida ta' 100 lira tal-2005-2009.

Storja

Il-Palazz ta' Ishak Paşa minn ġewwa.

Il-kostruzzjoni tal-palazz bdiet fl-1685 u kompliet għal deċennji sħaħ. Ix-xogħol tlesta fl-1784 jew fl-1785 W.K. Il-palazz ġarrab ħsarat minħabba terremot fl-1840 u għal xi żmien ġie abbandunat, iżda mbagħad ġie rrestawrat matul l-20 sena ta' wara. Reġa' ġarrab ħsarat matul il-Gwerra bejn ir-Russja u t-Turkija tal-1877-1878. L-istruttura iktar 'il quddiem intużat mir-Russi u matul l-Ewwel Gwerra Dinjija meta ġarrbet xi ħsarat mill-użu tal-armi tan-nar.

Iktar 'il quddiem, il-palazz intuża bħala ċ-ċentru amministrattiv tal-inħawi, u mbagħad bħala forti militari sal-1937. Il-palazz ġarrab iktar ħsarat meta beda jittieħed il-ġebel minnu biex jinbnew djar ġodda.

Fis-sena 2000 il-palazz ġie miżjud fil-lista tas-Siti Indikattivi tal-UNESCO biex fil-ġejjieni forsi jsir Sit ta' Wirt Dinji. Is-sommarju deskrittiv tal-UNESCO jistqarr li huwa:

Palazz tul it-Triq tal-Ħarir qrib il-fruntiera Iranjana ... Mhuwiex turija tat-tradizzjoni Ottomana iżda iktar huwa taħlita tat-tradizzjoni arkitettonika tal-Anatolja, tal-Iran u tat-Tramuntana tal-Mesopotamja. Il-mudell tradizzjonali li ntuża fil-kostruzzjoni tal-Palazzi Rjali fil-bliet kapitali bħal Bursa, Edirne u Istanbul ittieħed bħala eżempju fid-disinn tal-Palazz ta' Ishak Paşa. Wieħed jista' josserva l-influwenza tal-Punent fl-arkitettura Ottomana matul il-perjodu post-Klassiku... (traduzzjoni mhux uffiċjali).

Matul restawr li sar fl-2004 nstabu bosta problemi strutturali kbar u ma ġewx imsewwija għalkollox. Matul restawr sussegwenti, żdied saqaf ġdid kif ukoll irpar fuq xi partijiet tal-palazz, magħmul mill-injam u mill-ħġieġ. Naturalment, dan biddel il-bixra storika tal-palazz. Fl-2011 sar restawr ieħor.

Il-palazz huwa miftuħ għall-viżitaturi. Il-biljett tad-dħul jinkludi ż-żjara tal-palazz kif ukoll l-oqbra tal-blat Urartjani li ġew skoperti fl-1830 u li jingħad li huma ta' sekli sħaħ ilu, x'aktarx bejn is-sekli 13 u 19 Q.K.

Sezzjonijiet tal-palazz

Detall tal-palazz minn ġewwa.

Detall tat-tiżjin tal-palazz minn ġewwa.

Il-kumpless tal-palazz jikkonsisti mis-sezzjonijiet li ġejjin:

• il-faċċati esterni;
• l-ewwel u t-tieni bitħa interni;
• il-kwartier tal-irġiel (selamlık);
• il-moskea;
• il-kċina tas-sopop (Darüzziyafe);
• il-banju;
• il-ħarem;
• is-sala taċ-ċerimonji u tad-divertiment;
• id-daħliet bil-ħnejjiet;
• l-imħażen u l-kamra tal-munizzjon;
• il-mawżolew;
• il-kamra tal-furnar;
• il-kantini;
• is-sistema ċentrali tat-tisħin.

L-iżjed karatteristika li tispikka tal-palazz hi l-istil arkitettoniku mħallat tiegħu b'elementi Ottomani, Persjani u Armeni.

Gallerija

• 
  Dettall tal-ħnejjiet fuq ġewwa.
• 
  Veduta tal-Palazz ta' Ishak Paşa mill-għoli.
• 
  Il-ħarem.
• 
  Il-koppla tal-palazz minn ġewwa.
• 
  Veduta tal-Palazz ta' Ishak Paşa mill-għoli.
• 
  Veduta mill-bitħa interna.
• 
  Veduta tal-palazz minn ġewwa.
• 
  Id-daħla tal-kumpless.