Francesco Azopardi

Francesco Azopardi (5 ta’ Mejju, 1748 – 6 ta’ Frar 1809) kien kompożitur, teoriku tal-mużika u organista Malti.

Francesco Azopardi
Plakka r-Rabat
Ħajja
Twelid	Rabat, 5 Mejju 1748
Mewt	Rabat, 6 Frar 1809
Edukazzjoni
Alma mater	Conservatorio di Sant'Onofrio in Capuana
Lingwi	Taljan
Għalliema	Michelangelo Vella
Studenti	uri Nicolò Isouard
Okkupazzjoni
Okkupazzjoni	organist kompożitur teoriku tal-mużika
Impjegaturi	Katidral ta’ San Pawl Konkatidral ta' San Ġwann
Strument/i tal-mużika	orgni

Bijografija

Francesco Azzopardi (magħruf aktar bħala Azopardi) twieled ir-Rabat, Malta. L-ismijiet tal-magħmudija kienu Giovanni Battista Agostino Francesco Giuseppe.

Kellu l-ewwel tagħlim fil-mużika minn Michelangelo Vella. Mill-1763 sal-1774 kien Napli, l-ewwel biex jistudja fil-Conservatorio di Sant'Onofrio ta' Porta Capuana taħt it-tmexxija ta’ Carlo Contumacci u Joseph Doll, imbagħad, mill-1767, biex ikompli jipperfezzjona ruħu ma' Niccolò Piccinni.

Fl-1768 Azzopardi kien diġà kkompona l-ewwel xogħol liturġiku tiegħu, il-Quddiesa fil-Fa (Ms 339). F'Napli offrewlu l-post ta' Maestro di Capella imma xtaq li jmur lura Malta.

Fl-1774 reġa' lura Malta u fit-12 ta' April inħatar organista tal-Katidral ta' San Pawl, l-Imdina, bid-dritt li jsir Maestro di Cappella. Il-Maestro di Cappella dak iż-żmien kien Don Benigno Zerafa (1726-1804). Wara l-1789 kien attiv ukoll fil-Knisja Konventwali tal-Kavalieri ta' Malta il-Belt Valletta. Francesco Azzopardi nħatar Maestro di Cappella fil-Katidral tal-Imdina, wara Benigno Zerafa, fit-8 ta' Diċembru 1783.

Ikkompona xi 250 xogħol, il-parti kbira mużika sagra: 31 quddiesa, 76 salm, 6 Magnificat, 2 Passjonijiet, 6 Lamentazzjonijiet, 70 Motett, 16-il Antifona u biċċiet għall-orgni għall-Milied. Imma l-ikbar xogħol tiegħu kien it-trattat pedagoġiku, Il musico prattico I tal-1786. Minħabba dan kiseb fama internazzjonali meta Nicolas-Étienne Framery ttraduċih għall-Franċiż u Le Duc ippubblikah bit-titlu Le Musicien Pratique. Jidher li s-suċċess tiegħu dam ħafna għax fl-1824 il-mużikoloġista Franċiż Alexandre Choron ħareġ edizzjoni ġdida bl-istess isem. Azzopardi baqa' jfittex teoriji ġodda u fl-1809 ħareġ verżjoni oħra, Il musico prattico II, fejn espanda l-prinċipji tal-ewwel verżjoni u żied magħhom.

Azzopardi kien wieħed mill-għalliema ta' Nicolò Isouard. Miet ir-Rabat, Malta.

Xogħlijiet

Mużika vokali profana

• Malta felice (cantata, 1775)
• La magica lanterna (opra buffa, 1791)

Mużika vokali sagra

• La passione di Cristo (oratorju, librett ta’ Pietro Metastasio, 1802)
• Bosta quddisiet komposti mill-1768 sal-1806
• Bosta xogħlijiet sagri komposti mill-1772 sal-1796
• Kanti, innijiet, salmi komposti mill-1772 sal-1807

Mużika strumentali

• Ouverture għal 2 oboi, 2 vjolini, 2 korni, basso u orgni (1782)
• Sinfonija għal 2, 2 vjolini, vjola, 2 korni u basso continuo (1797)
• Sinfonija għal oboe obbligato, oboe, 2 vjolini, 2 korni u basso continuo (1799)

Trattati

• Il musico prattico
• Il musico prattico II
• Dissertazione sulla risoluzione della quinta falsa in 6/4 rivolto dell'armonia di 5/3
• Dissertazione sulla musica greca

Bibljografija

• P. Pullicino - Notizia biografica di Francesco Azzopardi - Malta, 1876
• D. Buhagiar - Francesco Azopardi (1748-1809): A Maltese Classical Composer, Theorist, and Teacher - Mediterranean Institute, l-Università ta' Malta, l-Imsida, Malta, 1999, Teżi
• F. Bruni - Musica sacra a Malta - Malta, 1993

Diskografija

• Unveröffentlichte Manuskripte aus der Kathedrale von Malta, Francesco Azopardi, Nisi Dominus - Tölzer Knabenchor, Wolfgang Schady - ISBN: B0000285YX