Elena Ceaușescu

Elena Ceaușescu (imwielda bħala Lenuța Petrescu; twieldet fis-7 ta' Jannar 1916 – mietet fil-25 ta' Diċembru 1989) kienet il-mara ta' Nicolae Ceaușescu, il-kap Komunista tar-Rumanija. Hi serviet ukoll bħala Viċi-Prim Ministru tar-Rumanija.

Elena Ceaușescu
Viċi Prim Ministru
Ħajja
Isem propju	Lenuta Petrescu
Twelid	Petrești, 7 Jannar 1916
Nazzjonalità	Rumanija
L-ewwel lingwa	Rumen
Mewt	Târgoviște (en) , 25 Diċembru 1989
Post tad-dfin	Ċimiterju ta' Ghencea
Kawża tal-mewt	piena kapitali (ferita b'tir ta' arma tan-nar)
Familja
Konjuga/i	Nicolae Ceaușescu
Ulied	uri Nicu Ceaușescu (en) Zoia Ceaușescu (mul) Valentin Ceaușescu (en)
Tribù	Ceaușescu family (en)
Edukazzjoni
Alma mater	University of Bucharest (en)
Lingwi	Rumen
Okkupazzjoni
Okkupazzjoni	Strigoi (en)
Premjijiet	List Hero of the Socialist Republic of Romania Order of the Victory of Socialism Grand Collar of the Order of Prince Henry Order of the Liberator General San Martín Knight Grand Cross of the Order of Merit of the Italian Republic Order of the Yugoslav Star anniversary medal at the occasion of the 2500th anniversary of the founding of the Iranian Empire Order of the Defender of the Realm [[]]  (1979)

Bijografija

Lenuța Petrescu twieldet f'familja ta' bdiewa fir-raħal ta' Petrești, fid-distrett ta' Dâmbovița. Rekords skolastiċi juru li l-unika marka tajba li ġabet kien fix-xogħol tal-labar fl-iskola primarja. Wara l-iskola primarja marret tgħix flimkien ma' ħuha fil-belt ta' Bukarest fejn għall-bidu kienet taħdem bħala assistenta f'laboratorju qabel ma sabet xogħol f'fabbrika tat-tessuti. Fl-1939 issiebħet mal-Partit Komunista Rumen u hemmhekk iltaqgħet maż-żagħżugħ Nicolae Ceaușescu. Ceaușescu mal-ewwel laqtitu lil Elena, u għalkemm ir-relazzjoni tagħhom kienet waħda imħarbta minħabba li Ceaușescu kien dieħel u ħiereġ il-ħabs, huma żżewġu fit-23 ta' Diċembru 1947.

Karriera fil-gvern

Elena Ceaușescu flimkien ma' Ion Iliescu fl-1976

Wara li l-Komunisti ħadu l-poter, Elena ħadmet bħala segretarja fil-Ministeru tal-Affarijiet Barranin. Meta r-raġel tagħha sar segretarju ġenerali tal-partit, Elena ngħatat diversi uffiċċji fil-Partit Komunista Rumen. F'Ġunju tal-1973 hi saret membru tal-Politburo tal-Partit Komunista, biex b'hekk laħqet bħala t-tieni l-ogħla u l-iktar figura influwenti wara Ceaușescu innifsu. Hi kienet involuta ħafna fl-amministrazzjoni tal-partit flimkien ma' żewġha, u kienet fost il-ftit min-nisa miżżewġa ta' kapijiet tal-Partit Komunista li kellha profil politiku għoli.

Elena kienet takkumpanja lil żewġha f'diversi żjarat uffiċjali barra mill-pajjiż. Waqt żjara statali lir-Repubblika Popolari taċ-Ċina f'Ġunju tal-1971, hi nnutat kif Jiang Qing, il-mara tal-President Mao Zedong, kellha pożizzjoni ta' poter. B'riżultat t'hekk bdiet taħdem biex tikseb iktar poter politiku fir-Rumanija. F'Ġunju tal-1971, ġiet eletta bħala membru tal-Kummissjoni Ċentrali fuq it-Tbassir Soċjo-Ekonomiku, u f'Lulju tas-sena ta' wara, saret membru sħiħ tal-Kumitat Ċentrali tal-Partit Komunista. F'Ġunju tal-1973, wara li ġiet nominata minn Emil Bodnăraș, ġiet eletta fil-Kumitat Eżekuttiv tal-partit. F'Novembru tal-1974, matul il-ħdax-il Kungress tal-Partit, saret membru tal-kumitat eżekuttiv politiku, u f'Jannar tal-1977, saret membru tal-ogħla korp fi ħdan il-partit, l-Uffiċċju Permanenti tal-Kumitat Eżekuttiv Politiku. F'Marzu tal-1975, ġiet eletta fil-Gran Assemblea Nazzjonali, il-leġiżlatura nazzjonali tal-pajjiż, fejn ħadet is-siġġu ta' Pitești (fid-disrett ta' Arges), l-iktar reġjun industrijali importanti fil-pajjiż. Din il-kariga baqgħet iżżommha sa mewtha. F'Marzu tal-1980, saret Viċi-Prim Ministru, titlu statali li wkoll żammitu sar-Rivoluzzjoni Rumena.

Mis-snin tmenin 'il quddiem, Elena kienet iċ-ċentru ta' kult tal-personalità li kien jilħaq lil dak ta' Nicolae. Hi kienet magħrufha bħala "Omm in-Nazzjon". Bħal żewġha, it-Televiżjoni Rumena kienet taħt ordnijiet stretti sabiex tinkwadraha bl-aħjar mod possibbli, fosthom li ma kellhiex tintwera fil-profil minħabba mneħirha kbir u d-dehra sempliċi tagħha.

It-tmiem

Elena u Nicolae mal-Imperatur Hirohito waqt żjara f'Tokjo fl-1975

Nhar is-16 ta' Diċembru 1989, f'Timișoara nġabret ġemgħa biex tappoġġja lill-qassis Ungeriż Laszlo Tokes li kien arrestat wara li attakka t-tmexxija ta' Ceaușescu. Din kibret aktar minn mistenni għal protesta kbira kontra l-gvern. L-armata sparat fuq il-folla u mijiet sfaw vittmi. Fl-20 ta' Diċembru saret it-tieni protesta fejn fiha ħadu sehem 50,000 ruħ, bl-uniku għan kien li jipprotestaw kontra l-gvern u Nicolae Ceaușescu. Nicolae, fuq parir ta' Elena, ordna li l-għada kellha ssir attività fil-pjazza ċentrali ta' Bukarest. Hemmhekk inġabru mat-80,000 ruħ li malli Nicolae tfaċċa fil-parapett flimkien ma' martu u d-diversi uffiċjali tal-Partit, qabdu jgħajtu għajat kontra ż-żewġ dittaturi.

Bis-sitwazzjoni teskala, Elena ħarbet ma' żewġha fit-22 ta' Diċembru, però nqabdu fil-belt ta' Târgoviște. Fil-proċess hi wieġbet għal ftit mistoqsijiet minħabba li Nicolae ħa rwol protettiv, saqsiha sabiex tikkalma u xengel rasu kull darba li kienet titkellem b'rabja. Nhar il-Milied, fil-25 ta' Diċembru, ġew sentenzjanti għall-mewt. Huma ntrabtu b'idejhom wara darhom u ttieħdu barra fejn skwadra tal-isparar sparat fuq it-tnejn. Hi kellha 73 sena. Hi kienet l-unika mara li qatt ingħatat il-piena kapitali fl-istat modern tar-Rumanija.

Unuri

• Imperu tal-Iran: Midalja kommemorattiva tal-2,500 sena anniversarju mit-twaqqif tal-Imperu Persjan (14 ta' Ottubru 1971)
• Repubblika Taljana: Kavallier tas-Salib il-Kbir tal-Ordni għall-Mertu tar-Repubblika Taljana (21 ta' Mejju 1973)
• Repubblika Arġentina: Kavallier tas-Salib il-Kbir tal-Ordni tal-Ġeneral Liberatur San Martín (1974)
• Repubblika Portugiża: Gran Kullar tal-Ordni tal-Infanti Dom Henrique (12 ta' Ġunju 1975)
• Filippini: Ordni ta' Gabriela Silang (9 ta' April 1975)
• Malażja: Gran Kmandat Onorarju tal-Ordni tad-Difensur tar-Renju (1984)

Aqra iktar

• Sweeney, John (1991). The Life and Evil Times of Nicolae Ceauşescu (bl-Ingliż).
• Behr, Edward (1991). Kiss The Hand You Cannot Bite (bl-Ingliż). ISBN 0-679-40128-8.