Pawlu Cremona

Pawlu Cremona
arċisqof metropolitan ta ’Malta	; 26 Jannar 2007 - 18 Ottubru 2014 ; ← Ġużeppi Mercieca - Charles J. Scicluna → ; Dioceses: Arċidjoċesi ta' Malta
arċisqof metropolitan ta ’Malta
Ħajja
Twelid	Valletta, 25 Jannar 1946 (78 sena)
Nazzjonalità	Malta
Edukazzjoni
Alma mater	Università Pontificia San Tommaso d'Aquino
Lingwi	Ingliż
Okkupazzjoni
Okkupazzjoni	Qassis fil-Knisja Kattolika; Isqof Kattoliku

L-Arċisqof Emeritu Mons. Pawl Cremona OP (Valletta, 25 ta' Jannar 1946) huwa patri Dumnikan u kien it-tielet Arċisqof ta' Malta. Huwa ġie ordnat isqof fis-26 ta' Jannar, 2007 fil-Kon-Katidral ta' San Ġwann. Nhar it-18 ta' Ottubru 2014 tħabbar li l-Papa Frangisku aċċetta r-riżenja tal-Arċisqof Cremona, minħabba raġunijiet ta’ saħħa.

Tfulija

Pawlu Cremona twieled il-Belt Valletta nhar il-25 ta' Jannar 1946, bin Joseph u Josephine imwielda Cauchi. Għandu żewġ ħutu oħra; ħuh ikbar minnu u oħtu iżgħar minnu. Hu ħa l-edukazzjoni primarja tiegħu fl-iskola Montessori l-Belt u kompla l-edukazzjoni sekondarja tiegħu fil-Liċeo.

Patri Dumnikan

Daħal fl-Ordni ta' San Duminku f'Settembru ta' l-1962 u għamel il-Professjoni fl-istess Ordni nhar id-29 ta’ Settembru 1963. Studja l-Filosofija u t-Teoloġija fil-Kulleġġ ta’ San Tumas ta’ Akwinu fil-kunvent tad-Dumnikani tar-Rabat u ġie ordnat saċerdot nhar it-22 ta’ Marzu 1969. Hu studja l-filosofija u t-teoloġija fil-Kulleġġ ta' Tumas ta' Aquino fir-Rabat, mnejn ħa d-dottorat fit-Teoloġija Morali fl-1973 fl-Università Pontifiċja ta' San Tumas ta' Aquino f'Ruma. Hu studja t-teoloġija Morali fl-Università Pontifiċja ta' San Tumas ta' Aquino f'Ruma, fejn kiseb id-Dottorat fl-1973 bit-teżi The Concept of Peace in Pope John XXIII. Sal-1973 hu kien jgħallem it-teoloġija morali fil-Kulleġġ ta' San Tumas ta' Aquino.

Provinċjal u Kappillan

Fil-Provinċja Dumnikana Cremona serva bħala Provinċjal bejn l-1981 u l-1989. Hu kien kappillan tal-Parroċċa tal-Madonna ta' Fatima fi Gwardamanġa bejn l-1989 u l-1993. Bejn l-1993 u l-1997 kien responsabbli mill-Formazzjoni tan-Novizzi u l-Istudenti Dumnikani fir-Rabat – uffiċċju li reġa’ kellu għal żmien ieħor qasir bejn l-2004 u l- 2005. Fl-2005, Patri Pawl Cremona ġie maħtur bħala Kappillan tal-Parroċċa ta’Ġesù Nazzarenu, f’Tas-Sliema.

Patri Pawl serva wkoll bħala President tal-Konferenza tas-Superjuri Maġġuri bejn l-1984 u l-1987, kien President tal-Kunsill tal-Formaturi tal-Ħajja Reliġjuża bejn l-1993 u l-1995 u kien ukoll delegat ta' l-Arċisqof għall-Ħajja Konsagrata sa mill-1995.

Fl-1994 ingħata l-medalja Pro Ecclesia et Pontefice.

Awtur

Patri Pawl Cremona ppubblika t-teżi tiegħu The Concept of Peace in Pope John XXIII fl-1988 u l-ktieb L-Abort - Ħajja jew Mewt, fl-1978. Ippubblika wkoll il-ktieb Il-Knisja Ikona tat-Trinita Qaddisa kif ukoll, flimkien ma' Patri Ġorġ Frendo, Isqof ieħor Dumnikan, tliet kotba fuq it-temi tat-tliet snin ta' tħejjijia għas-sena 2000 u dwar l-Ewkaristija fis-sena 2000.

Ordinazzjoni Episkopali

Nhar it-2 ta' Diċembru 2006, in-Nunzju Appostoliku għal Malta Felix del Blanco Prieto ippreżenta lill-Arċisqof il-ġdid lill-Kunsill Presbiterali. L-ewwel messaġġ ta' Cremona kien: "Għalikom jien Isqof, magħkom jien nisrani. Aħna lkoll midinbin, ejja nimxu mixja spiritwali flimkien". Fid-diskors tiegħu, Patri Cremona irringrazzja lil Mons. Ġużeppi Mercieca għax-xogħol siewi tiegħu. Hu wiegħed li se jagħti l-impenn kollu tiegħu f'din il-kariga bil-limitazzjonijiet kollha tiegħu. Patri Cremona appella lill-kulħadd sabiex jitlob għalih biex iwettaq u jaqdi l-kariga l-ġdida tiegħu bl-aħjar mod. Hu qal li matul il-kariga, huwa se jaħdem biex iservi ta' medjatur biex iressaq in-nies aktar viċin ta' xulxin u jkun aktar viċin tal-poplu Nisrani.

L-aħbar tal-ħatra ta' Patri Pawl Cremona kienet sorpriża għall-maġġoranza tal-Maltin. Is-simpatija naturali tiegħu għamlitu mill-ewwel maħbub mal-Maltin.

Huwa ġie ordnat isqof fis-26 ta' Jannar, fil-Kon-Katidral ta' San Ġwann 2007 mill-Arċisqof Emeritus Ġużeppi Mercieca; u mill-ko-konsagranti: in-Nunzju appostoliku Felix del Blanco Prieto u mill-Isqof George Anthony Frendo OP, ħabib antik ta' Mons. Cremona, u Isqof awżiljari fl-Arċidjoċesi ta' Tirana-Duress fl-Albanija.

Fl-Ordinazzjoni tiegħu bħala Isqof, nhar is-26 ta' Jannar 2007, Mons. Pawl Cremona kien liebes l-alba ta' Papa Ġwanni XXIII li rregalalu s-Segretarju tal-Papa, Loris Capovilla. Fl-omelija tiegħu dakinhar, Cremona qal hekk:

“ Jiena nixtieq li jkunu tiegħi xi wħud mill-proponimenti li għamel il-Beatu Papa Ġwanni XXIII fl-irtir tal-Konsagrazzjoni Episkopali tiegħu fl-1925. Naħseb tafu li din l-alba li jiena qed nilbes illum kienet tal-Papa Ġwanni XXIII, li jiena qed nilbes b’tant biża u tant venerazzjoni. Il-Papa qal hekk: 'Jiena ma fittixtx jew xtaqt dan il-ministeru tiegħi; il-Mulej għażilni… imiss lilu li jgħatti n-nuqqasijiet tiegħi, u jimla l-limitazzjonijiet tiegħi…. Jiena nħoss u naf li jien bla saħħa u mhux kapaċi, raġuni oħra biex nibqa’ umli, ħafna ħafna umli. Jien irrid li nkun kollni u totalment għal Alla, mimli bid-dawl tiegħu, niddi bl-imħabba għal Alla u għall-erwieħ tal-bnedmin.'
Jalla l-ministeru tiegħi jkun wieħed ta’ Rikonċiljazzjoni fil-kelma u fl-għemil; u l-predikazzjoni tiegħi mhux fil-persważjoni tal-kliem ta’ l-għerf uman, iżda fil-wirja ta’ l-ispirtu u l-qawwa; u l-awtorità li ġiet mogħtija lili mill-Knisja, qatt ma tiġi wżata għall-glorja tiegħi – użata mhux biex tkisser iżda biex tibni… ”

Suċċessjoni

L-Arċisqof Pawlu Cremona f'Bolonja 3 ta' Lulju, 2007

Mons. Cremona issuċċeda lil Mons. Ġużeppi Mercieca, li serva ta' Arċisqof mid-29 ta' Novembru, 1976, sat-2 ta' Diċembru, 2006 meta dan tal-aħħar laħaq l-età tal-irtirar.

Ko-Konsagrant

Nhar l-24 ta' Mejju 2009, Mons. Pawl Cremona kien il-ko-konsagrant ewlieni tal-Isqof Malti Joseph Spiteri, li ntbagħat Nunzju Appostoliku fi Sri Lanka.

Ħidma bħala Arċisqof

Huwa aġġorna l-proċedura tal-investigazzjoni ta' każijiet ta' abbużi sesswali biex ma jkunx hemm dewmien.

Stinka biex jonqos iż-żmien ta' stennija fit-Tribunal Ekkleżjastiku, kif fil-fatt ġara ħlief f'każijiet meta jkun hemm bżonn ta' parir ta' esperti minn barra mit-Tribunal.

Introduċa d-djakonat permanenti f'Malta.

Ta struzzjonijiet biex it-trabi kollha jitgħammdu flimkien f'quddiesa apposta minflok ma ssir magħmudija tat-trabi bil-bibien tal-knisja magħluqa jew wara l-altar.

Ħa interess personali fil-formazzjoni tas-seminaristi, b'laqgħat regolari individwali ma' kull wieħed minnhom, u żjarat fis-seminarju. Dan minbarra li introduċa laqgħat bejn it-tmexxija tas-seminarju u l-fakultà tat-Teoloġija tal-Università ta' Malta.

Introduċa wkoll il-laqgħa tal-Konferenza Episkopali regolarment kull xahar.

Wessa' l-involviment tal-lajċi fit-tmexxija tad-djoċesi bħala delegati tiegħu minħabba li, sakemm laħaq hu, id-Delegati tal-Arċisqof kienu jkunu kważi dejjem qassisin.

Kompla jimplimenta dak li qal is-Sinodu Djoċesan u introduċa strutturi ġodda għall-oqsma dfferenti tal-ħidma pastorali.

Fil-qasam tal-midja tal-Knisja, approva proġetti ta' ristrutturazzjoni u ħa d-deċiżjonijiet neċessarji biex l-entitajiet tal-midja jaġġornaw ruħhom għall-isfidi tal-era diġitali. Kien strumentali biex jitwaqqaf il-portal tal-aħbarijiet tal-Knisja bi struttura ġdida tal-kamra tal-aħbarijiet tal-RTK, u biex il-Media Centre tal-Knisja tiġi ristrutturata.

Għamel żjajjar pastorali fis-70 parroċċa ta’ Malta kollha kemm huma. Żjajjar bħal dawn kienu ilhom ma jsiru għexieren ta’ snin. Matulhom, minbarra li ltaqa’ ma’ ħafna nies li huma nvoluti fl-appostolat, mas-saċerdoti kollha wieħed wieħed, mal-komunitajiet reliġjużi kollha, u mal-membri tas-soċjetà ċivili, żar ukoll l-iskejjel primarji kollha u lil madwar 250 familja u morda, qaddes u ltaqa’ man-nies taż-żoni, u ltaqa’ individwalment ma ‘l fuq minn 300 persuna.

Ippropona lill-parroċċi evanġelizzazzjoni permezz ta’ gruppi żgħar li jiltaqgħu qrib ta’ fejn jgħixu 'l familji.

Kien ikollu laqgħat u diskussjonijiet informali u regolari fi gruppi żgħar ma' żgħażagħ li tbegħdu mis-sagramenti u mill-Knisja.

Għamel ukoll numru ta’ omeliji li jwasslu messaġġ uman u soċjali, b’riflessjonijiet spiritwali li tkun qed twassal il-Knisja mad-dinja.

Parroċċi ġodda

Fi żmien l-episkopat ta' Mons. Pawl Cremona saret parroċċa waħda ġdida:

Il-Parroċċa tas-Swatar iddedikata lil San Ġorġ Preca (8 ta' Novembru 2008)

Il-kwistjoni tal-liġi tad-divorzju

Nhar is-6 ta' Lulju 2010, l-Arċisqof Pawl Cremona stqarr li l-Private Member’s Bill li ppreżenta dakinhar id-Deputat Nazzjonalista Jeffrey Pullicino Orlando fil-Parlament kienet bħal sajjetta fil-bnazzi, peress li l-kwistjoni tad-dħul tad-divorzju ma saritx referenza għaliha fil-manifest elettorali taż-żewġ partiti l-kbar matul il-kampanja elettorali tal-aħħar Elezzjoni Ġenerali. Meta kien qed jitkellem fi programm radjufoniku fuq l-istazzjon tal-Knisja, l-Arċisqof Cremona qal li hemm lok fejn wieħed jista’ jiddiskuti r-relazzjoni bejn il-Membri Parlamentari u l-poplu. Qal li “l-Membri Parlamentari kienu eletti mill-poplu fuq il-bażi ta’ dak li kien imwiegħed minnhom. Fl-aħħar elezzjoni kellna partit partikolari li kien favur id-divorzju, madankollu l-partiti l-kbar m’għamlu ebda referenza għal din il-kwistjoni”. L-Arċisqof qal li l-Knisja dejjem kienet konsistenti fil-pożizzjoni tagħha kontra d-divorzju, peress li minn dejjem riedet żwiġijiet stabbli, li huma l-aħjar ħaġa għas-soċjetà. “Anke l-istat għandu jaħdem biex ikollna żwiġijiet aktar b’saħħithom,” qal l-Arċisqof. Qal li jekk id-divorzju ma jidħolx hemm min se jbati, però jekk dan jiġi legalizzat hemm min se jbati wkoll. Barra minn Malta fejn id-divorzju huwa legalizzat, jiġru ħafna każijiet fejn ikun hemm xi ħadd mill-koppja li jitlaq biex jibda relazzjoni ma’ persuna oħra. “Għalhekk, jekk id-divorzju jkun legalizzat aħna nkunu qegħdin ngħidu lil dik il-persuna biex jekk trid titlaq u tifforma relazzjoni fi żwieġ ma’ persuna oħra.” Dwar jekk il-Membri Parlamentari għandhomx jivvotaw favur jew kontra d-divorzju fil-Parlament, l-Arċisqof qal li jekk dan huwa Kattoliku bilfors li irid jgħaddi minn kunflitt dwar x’għandu jagħmel. Madankollu l-Arċisqof qal li “persuna li hija konvinta mir-reliġjon tagħha trid tivvota għal żwieġ b’saħħtu u stabbli.” Qal li l-Knisja mhux se tagħmel kruċjata kontra d-dħul tad-divorzju, “madankollu l-irwol tagħha huwa li tidħol fid-dibattitu u tagħmel il-pożizzjoni tagħha ċara.” Dwar il-koabitazzjoni, l-Arċisqof qal li l-Knisja hija kontra wkoll, peress li din hija ċirkostanza li twassal għal instabbiltà fost il-familji.

F'Nota Pastorali fis-17 ta' Ottubru 2010, li nqrat fil-parroċċi kollha, l-Arċisqof Cremona u l-Isqof ta’ Għawdex Mario Grech qaluu li hija l-attitudni tagħna li trid tinbidel, u mhux iż-żwieġ. “Kieku Ġesù kien fostna llum u konna ngħidulu li fid-dinja kollha daħħlu d-divorzju, żgur li ma kinitx tinbidel it-tweġiba tiegħu. Kien jgħid li dak minħabba l-ebusija ta’ qalbna.” Qalu li l-ebda nisrani ma jista’ jippretendi li Ġesù kien iwieġeb li biex insaħħu ż-żwieġ, għandu jidħol id-divorzju. Wara d-divorzju, ma tistax titkellem iktar fuq żwieġ dejjiemi, stabbli, bħalma kien il-pjan ta’ Alla fil-bidu. L-Isqfijiet jgħidu li l-kliem ta’ Ġesù jiġi ppruvat mir-realtà ta’ ħafna pajjiżi. “Daħħlu d-divorzju għax ħasbu li se jsolvu l-problemi madwar il-falliment taż-żwieġ u minflok żdiedu l-problemi. Dan jidher ċar mir-riċerki u l-istatistika.” Qalu li l-Knisja għandha l-missjoni li tqiegħed lil kull membru tagħha quddiem Ġesù u t-tagħlim tiegħu. “B’din in-nota nixtiequ nqiegħdu lil kull nisrani li għażel li jimxi wara Kristu, quddiem Ġesù stess, qisu qigħed jisimgħu llum. Il-kliem ta’ Ġesù għandu jsir id-dawl tal-kuxjenza li fuqha jrid jimxi n-nisrani, issir responsabbiltà morali li jwettaqha. Huwa quddiem Ġesù li n-nisrani jrid jagħti rendikont ta’ kull għemil tiegħu, anke fil-każ taż-żwieġ u d-divorzju.” L-Isqfijiet għamlu sejħa lil kull nisrani biex iwasslu l-kliem ta’ Ġesù. “Fl-istorja tal-Knisja, mumenti bħal dawn kienu importanti biex il-Knisja tikber iktar.”

Ix-xniegħa li se jinħatar Kardinal

Nhar it-22 t'Awwissu 2010, il-ġurnal Il-Mument ta l-aħbar li "Wara kważi 200 sena ta' stennija, Malta jista' jkollha Kardinal sa tmiem din is-sena. Sorsi barranin qrib il-Vatikan li tkellmu ma' dan is-sit spjegaw kif l-Arċisqof ta' Malta Pawlu Cremona qed ikun kunsidrat b'possibbiltà kbira bħala wieħed minn grupp ta' Kardinali ġodda li l-Papa Benedittu XVI mistenni jaħtar dalwaqt, aktarx bejn Ottubru u Diċembru ta' din is-sena."

Nhar l-20 ta' Ottubru 2010, il-Papa Benedittu ħatar 24 kardinal ġdid. Mons. Pawlu Cremona ma kienx wieħed minnhom.

Riżenja

Nhar it-18 ta' Ottubru 2014, in-Nunzju Appostoliku għal Malta, Monsinjur Aldo Cavalli ħabbar li l-Papa Frangisku aċċetta r-riżenja tal-Arċisqof Pawlu Cremona. Mons. Cremona rriżenja minħabba raġunijiet ta’ saħħa. Ir-riżenja daħlet fis-seħħ minn dakinhar stess f’nofsinhar. Mons. Cremona ngħata t-titlu ta’ Arċisqof Emeritu ta’ Malta.

F’ittra bid-data tat-8 t’Ottubru, indirizzata lill-Arċisqof Pawlu Cremona, il-Papa rringrazzja lill-Arċisqof Emeritu għall-ministeru episkopali tiegħu li kien magħruf u apprezzat għall-imħabba pastorali u l-kuntatt uman mill-qrib mal-Poplu ta’ Alla.

Waqt il-konferenza tal-aħbarijiet, l-Arċisqof Cremona qal li issa jinsab fil-paċi għax jaf li quddiem Alla għamel l-aħjar deċiżjoni. Spjega li ried ikun huwa stess li jwassal il-messaġġ lill-poplu Malti li mhux se jibqa’ Arċisqof, wara li kiteb lill-Papa. Żied jgħid li ħa d-deċiżjoni quddiem Alla għax saħħtu marret lura u jħoss li jkun aħjar li l-Knisja titmexxa minn xi ħaddieħor.L-Arċisqof Cremona ddeskriva bħala unur il-fatt li mexxa l-Knisja Maltija għal kważi tmien snin, fejn irringrazzja lil Alla għan-nies li bagħatlu biex jgħinuh. Qal li f’qalbu ma għandu l-ebda rankur għal ħadd u minn issa stess lest li jgħin lis-suċċessur tiegħu.

Min-naħa tiegħu, l-Isqof Awżiljarju Charles J. Scicluna rringrazzja lil Monsinjur Cremona u qallu li kien u jibqa’ xbieha sabiħa ta’ Ragħaj it-Tajjeb. Semma kif bħala Arċisqof kien dejjem qrib it-tbatija tal-poplu Malti u li dejjem il-poplu ammira l-kuraġġ li wera u l-ferħ li ġab. L-Isqof Scicluna awguralu ħajja twila biex il-poplu jkompli jgawdi dan id-don tal-Mulej.

Fi stqarrija l-Prim Ministru Joseph Muscat irringrazzja lill-Arċisqof Cremona għall-ħidma tiegħu. Muscat qal li l-Arċisqof Cremona dejjem żamm ‘il bogħod mill-politika partiġġjana u awgura li l-Arċisqof il-ġdid jagħmel l-istess għall-ġid tal-għaqda nazzjonali. “Huwa b'dispjaċir li ġejt mgħarraf bid-deċiżjoni ta' Monsinjur Pawlu Cremona li jirriżenja minn Arċisqof tal-Arċidjocesi ta' Malta. Ma hemmx l-iċken dubju li l-effet tat-tmexxija ta' Pawlu Cremona fuq il-Knisja Maltija kienet waħda pożittiva, fejn l-umiltà tiegħu magħquda mall-mod sempliċi li bih kien jispjega, ġibdet eluf ta' persuni warajh. Fl-istess ħin, l-interventi tiegħu kienu miżgħuda b' valur intelletwali għoli li jagħti lok għal riflessjoni. Matul it-tmexxija tiegħu, l-Arċisqof Cremona ra li l-Knisja Maltija tintervjeni f'dibattiti pubbliċi ta' importanza, speċjalment fil-qasam soċjali, iżda b'għaqal żamm lil Knisja 'il bogħod mill-politika partiġġjana. Nawgura li s-suċċessur tiegħu jimxi fuq dawn il-passi li jgħinu jġibu għaqda Nazzjonali. Il-bidla fit-tmexxija tal-Knisja f'Malta qed tasal f’waqt sinjifikattiv għal Knisja Kattolika madwar id-dinja, speċjalment fiż-żmien fejn qed jitlaqqa’ s-Sinodu dwar il-Familja, li d-diskussjonijiet fi ħdanu qed jagħtu tama lil ħafna. F'ismi u f'isem il-Gvern u l-poplu, nirringrazzja lil Monsinjur Pawlu Cremona għal ħidma kbira tiegħu u nawguralu dak li tixtieq qalbu,” intqal fi stqarrija mill-Prim Ministru.

Ħoloq Esterni

Predeċessur Ġużeppi Mercieca	Arċisqof ta' Malta 2006–2014	Suċċessur Charles Jude Scicluna