Baqra tal-baħar

Mammiferi plaċentati erbivori tal-baħar li jiffurmaw l-ordni Sirenia, mifruxa ma' ħafna ibħra, xmajjar w estwarji, ma' tul il-kosta ta' l-Afrika, l-Indja, l-Awstralja u ż-żewġ kontinenti Amerikani. Dawn il-mammiferi jiġu msejħa b'ħafna ismijiet bħal baqar tal-baħar, lamantini u dugongi fost oħrajn.

Baqar tal-baħar Firxa tal-fossili: Kmieni fl-Eocene - Reċenti
Lamantin tal-Karibew bl-għoġol (Trichechus manatus)
Klassifikazzjoni xjentifika
Renju:	Animalia
Phylum:	Chordata
Klassi:	Mammalia
Ordni:	Sirenia Illiger, 1811
Familji
Dugongidae Trichechidae Prorastomidae (estinta) Protosirenidae (estinta)

Distribuzjoni tal-lamantini

Distribuzjoni tad-dugongu

Il-baqar tal-baħar kollha il jeżistu llum għandhom metaboliżmu estremament baxx u tolleranza ta' xejn lejn l-ilma kiesaħ, biss xorta waħda huma mammiferi totalment akkwatiċi u bħal baleni u d-dniefel, f'ħajjithom ma' joħorġu qatt barra mill-ilma lanqas biex iwelldu. Minħabba dawn il-fatturi il-baqar tal-baħar jistgħu jgħixu biss f'ibħra baxxi u sħan mal-kosta, fi xmajjar u f'estwarji b'ekosistemi nodfa u b'saħħithom.

Il-lamantini (Trichechidae) u d-dugongi (Dugongidae) huma fil-periklu ta' estinzjoni. L-erba' speċi li huma kollha vulnerabli minħabba telf ta' abitat u mpatti negattivi oħra li huma relatati mal-bniedem, bħall-iżvilupp tal-kosta u żieda fil-popolazjoni.

Deskrizzjoni

Il-baqar tal-baħar għandhom ħafna adattazzjonijiet fisiċi għall-ħajja fl-ilma. L-idejn ġew modifikati b'mod biex jintużaw bħala tmun biex jgħinu fid-direzzjoni, is-saqajn tant ċkienu li baqa' biss 2 għadmiet midfuna fil-fond ġewwa l-muskoli u d-denb inbidel f'forma ta' moqdif.

Ir-ras hija waħda mill-partijiet li ġiet immodifikata l-aktar, biex dawn il-mammiferi jkunu jistgħu jieħdu in-nifs faċilment f'wiċċ l-ilma. Is-snien fil-ħalq naqsu drastikament ukoll u l-ftit li baqa' ġew addattati għal veġetazjoni ratba. Is-sider fil-mara qiegħed pożizjonat taħt l-idejn u għandhom par wieħed biss. Id-differenza bejn il-familja Trichechidae u l-familja Dugongidae hija fil-forma tad-denb u tar-ras. Għalkemm jidhru ħoxnin, il-baqar tal-baħar huma fusiformi w idrodinamiċi.

Dieta

Għad-differenza mill-mammiferi tal-baħar kollha l-oħra (dniefel, baleni, bumerini, iljuni tal-baħar u lutri tal-baħar) il-baqar tal-baħar huma mammiferi totalment erbivori u jieklu biss veġetazjoni u ħaxix tal-baħar biss.

Klassifikazzjoni

• Ordni Sirenia
  • Familja Prorastomidae (estinta)
  • Familja Protosirenidae (estinta)
  • Familja Dugongidae
    • Sottofamilja Dugonginae
      • Ġeneru Dugong
        • Dugong, Dugong dugon
    • Sottofamilja Hydrodamalinae
      • Ġeneru Dusisiren
        • Dusisiren dewana (estinta)
        • Dusisiren jordani (estinta)
        • Dusisiren takasatensis (estinta)
      • Ġeneru Hydrodamalis
        • Hydrodamalis cuestae (estinta)
        • Baqra tal-baħar ta' Steller, Hydrodamalis gigas (estinta)
  • Familja Trichechidae
    • Ġeneru Trichechus
      • Lamantin tal-Karibew, Trichechus manatus
      • Lamantin Afrikan, Trichechus senegalensis
      • Lamantin Amazoniku, Trichechus inunguis

Referenzi

• Shoshani, Jeheskel (November 16, 2005). Wilson, D. E., and Reeder, D. M. (eds) Mammal Species of the World, 3rd edition, Johns Hopkins University Press, 92-93
• The Paleobiology Database

Ħoloq esterni

• Manatee & Dugong Research, Education, & Conservation
• The earliest known Sirenian is Pezosiren portelli.