Teatru Akkademiku Reġjonali ta' Donetsk

It-Teatru Akkademiku Reġjonali ta' Donetsk (bl-Ukren: Донецький академічний обласний драматичний театр, bir-Russu: Донецкий академический областной драматический театр) kien teatru f'Mariupol fin-Nofsinhar tal-Ukrajna. It-teatru modern kien inbena fl-1960 bejn wieħed u ieħor fil-post fejn qabel kien hemm il-Knisja tal-Marija Maddalena. It-teatru nqered kważi għalkollox mill-attakki mill-ajru Russi fis-16 ta' Marzu 2022.

Veduta tat-teatru mill-ajru fl-2021

It-teatru kien magħruf ukoll bħala t-Teatru Reġjonali ta' Donetsk qabel ma ngħata status akkademiku f'Novembru 2007.

Il-faċċata tat-teatru

It-teatru f'Marzu 2022 wara attakk bil-bombi

Storja

• 1847 – L-ewwel darba li ġie ddokumentat li ġie tim teatrali f'Mariupol, taħt l-imprenditur V. Vinogradova. Peress li ma kien hemm l-ebda teatru fil-belt, it-tim tella' spettakli f'matmura mikrija fit-Triq Ekaterininskaya (illum il-ġurnata Triq Lenin).
• 1850 – 1860 – Matmura f'bitħa ta' Popov (resident lokali) tintuża bħala l-ewwel post teatrali – "It-Tempju ta' Muża ta' Melpomene". Il-binja kienet bażika ferm b'kundizzjonijiet elementari, iżda xorta waħda t-tim teatrali tella' bosta spettakli hemmhekk tul diversi staġuni. Dawn kienu jinkludu l-parteċipazzjoni minn atturi provinċjali ta' dak iż-żmien: Alexandrov, Neverov, Medvedeva, Stoppel, Novitsky, Minsky, Prokofyev, Piloni u oħrajn.
• 1878 – L-ewwel tim teatrali professjonali jitfaċċa fil-belt ta' Mariupol. Il-bidu tat-teatru ta' Mariupol ġie ffinanzjat minn iben merkant għani, Vasily Shapovalov, li kera kamra għat-teatru. Il-karrieri tal-atturi I. Zagorsky, L. Zagorsky, L. Linitskaja u oħrajn bdiet hemmhekk.
• 1887 – Il-ftuħ tat-teatru l-ġdid fit-8 ta' Novembru, imsejjaħ Sala tal-Kunċerti (sussegwentement issejjaħ it-Teatru tax-Xitwa). Kellu palk kbir, postijiet komdi fejn wieħed joqgħod bilqiegħda, post għall-orkestra u awditorju li kien jesa' 800 ruħ.
• 1880 – 1890 – Ittellgħu l-ispettakli ta' figuri straordinarji tat-teatru Ukren: M. Kropivnitsky, I. Karpenko-Kary, P. Saksagansky, M. Staritsky u oħrajn.
• 1920 – Tim teatrali kollettiv imsejjaħ "Teatru Ġdid" taħt il-ġestjoni ta' A. Borisoglebsky kien attiv fil-belt.
• 1934 – Jinħoloq it-teatru mużikali u tad-drammi ta' Mariupol (taħt it-tmexxija ta' A. Smirnov bħala l-kap u ta' A. Iskander bħala d-direttur ewlieni).
• 1959 – It-teatru ta' Mariupol jingħata l-istatus ta' Teatru Statali ta' Donetsk.
• 1960 – Fit-2 ta' Novembru kien hemm il-ftuħ uffiċjali tat-teatru rikostruwit u jittella' l-ewwel spettaklu.
• 1978 – Il-kumpanija teatrali tiċċelebra l-100 anniversarju. Il-kumpanija teatrali tingħata Unur għal merti sinifikanti fl-arti teatrali.
• 1985 – Jinfetaħ il-palk iż-żgħir tat-teatru.
• 2007 – Fit-12 ta' Novembru, skont l-ordni tal-Ministeru għall-Kultura u t-Turiżmu, it-teatru ngħata l-istatus ta' teatru akkademiku.
• 2022 – Fis-16 ta' Marzu, it-teatru nqered kważi għalkollox minn attakki bil-bombi mill-ajru matul l-invażjoni Russa tal-Ukrajna tal-2022. Mijiet ta' nies ċivili milli jidher kienu qed jistkennu fil-binja fil-mument tal-attakk. Minn immaġnijiet bis-satellita li ttieħdu qabel l-attakki mill-ajru, jidher li kienu nżebgħu l-ittri Russi "Дети" (li bir-Russu jfissru "tfal") mal-art fuq quddiem u fuq wara tal-binja, bħala tentattiv biex l-ajruplani militari Russi jkunu avżati. Fis-17 ta' Marzu, Dario Franceschini, il-Ministru Taljan għall-Kultura għarraf fuq il-paġna tat-Twitter tiegħu li l-Kabinett tal-Ministri tal-Italja kien approva l-proposta tiegħu biex pajjiżu joffri r-riżorsi u l-mezzi lill-Ukrajna biex it-teatru jerġa' jinbena mill-iktar fis possibbli.