Opossum ta' denbu sufi

L-opossum ta' denbu sufi, magħruf xjentifikament bħala Glironia venusta, huwa mammiferu marsupjal notturn, tal-familja Didelphidae, fl-ordni Didelphimorphia nattiv tal-kontinent tal-Amerika t'Isfel.

Opossum ta' denbu sufi
Stat ta' konservazzjoni
Riskju minimu  (IUCN 3.1)
Klassifikazzjoni xjentifika
Phylum	Chordata
Klassi	Mammalia
Ordni	Didelphimorphia
Familja	Didelphidae
Ġeneru	Glironia
speċi	Glironia venusta ,
Distribuzzjoni ġeografika
Informazzjoni ġenerali
Ħabitat	Ekwador

Dan huwa speċi ta' opossum b'morfoloġija addatata għal ħajja fis-siġar u dejjem insab jgħix f'abitat ta' foresti tax-xita (jew pluvjali) f'elevazzjonijiet ta' bejn 300 u 1000 metru 'l fuq mil-livell tal-baħar.

Deskrizzjoni

L-Opossum ta' denbu sufi għandu l-pil kannella fl-oranġo, b'żewġ linji suwed fuq rasu madwar l-għajnejn għal fuq l-imnieħer li jiffurmaw maskra u linja oħra griża tifred lil dawn it-tnejn minn fuq l-imnieħer sal-widnejn bla pil lewn kannella skur fl-iswed. Glironia venusta adult jikber bejn 16 u 20.5 ċentimetri eskluż id-denb li jkun ġeneralment itwal mil-ġisem b'tul ta' bejn 19.5 u 20.5 ċentimetri. Uniku fost l-opossumi dan il-marsupjal għandu denb sufi u peluż ħafna kważi mat-tul kollu tiegħu, kemm man-naħa ta' fuq kif ukoll mal-ġnub u dan il-fattizz partikolari jintuża fl-isem komuni ta' din l-ispeċi.

Dan l-opossum huwa annimal omnivoru u d-dieta prinċipali tikkonsisti minn frott, nettari, insetti, bajd u annimali vertebrati u invertebrati żgħar oħrajn.

Distribuzzjoni

Minn dan l-opossum rari inqabdu disa' eżemplari biss u l-aħħar wieħed kien maqbud fl-1989 (Tarifa u Anderson, 1997). Dan għandu distribuzzjoni ristretta u l-eżemplari kollha inqabdu fil-foresta tax-xita (jew pluvjali) tal-Amażonja fil-Bolivja, il-Brażil, l-Ekwador u l-Peru.

Riproduzzjoni

Ftit li xejn hemm informazzjoni dwar ir-riproduzzjoni ta' Glironia venusta, ħlief li l-organi riproduttivi huma simili tal-opossumi tal-ġeneru Caluromys. Il-mara għandha 4 mammae (sidra jew żejżiet) u dan juri li l-botna huma anqas numerużi minn dawk tal-biċċa l-kbira tal-possumi tas-sottofamilja Didelphinae. L-Opossum ta' denbu sufi mhuwiex mgħammar b'marsupju u dan jindika li l-frieħ sakemm jiżviluppaw dawn jinżammu imqabdin mal-pil fuq in-naħa taż-żaqq tal-omm.

Klassifikazzjoni

Dan il-ġeneru huwa monotipiku (jiġifieri huwa rappreżentat bi speċi waħda biss) u l-klassifikazzjoni tiegħu mhijiex mija fil-mija. Meta jkun ikklassifikat fil-familja Didelphidae, f'uħud mil-klassifikazzjonijiet ikun għalih waħdu fis-sottofamilja Glironiinae:

• Ordni Didelphimorphia
  • Superfamilja Didelphoidea
    • Familja Didelphidae
      • Sottofamilja Glironiinae
        • Ġeneru Glironia
          • Opossum ta' denbu sufi, Glironia venusta

Fi klassifikazzjonijiet oħrajn ikun parti mis-sottofamilja Caluromyinae flimkien mal-opossumi sufin:

• Ordni Didelphimorphia
  • Superfamilja Didelphoidea
    • Familja Didelphidae
      • Sottofamilja Caluromyinae
        • Ġeneru Glironia
          • Opossum ta' denbu sufi, Glironia venusta

Fi skemi oħrajn kemm-il darba jiġi kklassifikat fil-familja Caluromyidae (is-sottofamilja Caluromyinae elevata f'livell ta' familja):

• Ordni Didelphimorphia
  • Superfamilja Didelphoidea
    • Familja Caluromyidae
      • Ġeneru Glironia
        • Opossum ta' denbu sufi, Glironia venusta

Fil-familja Glironiidae (is-sottofamilja Glironiinae elevata f'livell ta' familja) jinsab għalih waħdu:

• Ordni Didelphimorphia
  • Superfamilja Didelphoidea
    • Familja Glironiidae
      • Ġeneru Glironia
        • Opossum ta' denbu sufi, Glironia venusta

Referenzi

• Wilson, D. E.; Reeder, D. M. Mammal Species of the World, 3rd edition, Johns Hopkins University Press, ISBN 0-8018-8221-4
• Eisenberg, John F.; Kent H. Redford (2000). Mammals of Neotropics: Ecuador, Bolivia and Brazil.

Ħoloq esterni

• Glironia venusta fuq il-Lista Ħamra tal-IUCN 2006
• Id-Databażi Palebijoloġika
• Glironia venusta fuq is-sit tal-Mużew taż-Żooloġija tal-Università ta' Michigan