Riżerva tal-Bijosfera tal-Baħar l-Iswed

Ir-Riżerva tal-Bijosfera tal-Baħar l-Iswed (bl-Ukren: Чорноморський біосферний заповідник) hija riżerva ta' bijosfera tal-Ukrajna li tinsab fiż-żona litorali tat-Tramuntana tal-Baħar l-Iswed, u tkopri r-reġjuni tal-Oblasts ta' Kherson u Mykolaiv, kif ukoll il-Golf ta' Tendra u l-Bajja ta' Yahorlyk. Ir-riżerva hija amministrata mill-Akkademja Nazzjonali tax-Xjenzi tal-Ukrajna.

Ir-Riżerva tal-Bijosfera tal-Baħar l-Iswed.

Storja

Ir-riżerva inizjalment ġiet stabbilita fl-14 ta' Lulju 1927 bħala parti mir-Riżerva Transmarittima permezz tad-digriet nru 172 tal-Kunsill tal-Kummissarji tal-Poplu tar-Repubblika Sovjetika Ukrena. Fl-1933, ir-riżerva saret istituzzjoni indipendenti tar-riċerka. Fl-1973 mar-Riżerva tal-Baħar l-Iswed żdiedu l-pjanuri tal-għargħar tad-Danubju, il-Gżejjer ta' Kinski fil-Bajja ta' Yahorlyk, u l-parti l-baxxa tal-Golf ta' Tendra. Is-sena ta' wara, ir-Riżerva ta' Yahorlyk biswit din ir-riżerva ġiet annessa wkoll. Fl-1981, il-pjanuri tal-għargħar tad-Danubju saru riżerva indipendenti. Fl-1983 ġiet stabbilita r-Riżerva tal-Bijosfera tal-Baħar l-Iswed li kienet tinkludi r-Riżerva Statali tal-Baħar l-Iswed u r-Riżerva Ornitoloġika Statali ta' Yahorlyk (bħala ż-żona ta' lqugħ tagħha). F'Diċembru 1984, ir-riżerva ġiet aċċettata fin-Network Dinji tar-Riżervi ta' Bijosfera. It-territorju tar-riżerva huwa inkluż ukoll fil-lista internazzjonali tal-Konvenzjoni Ramsar.

Ir-riżerva ġarrbet xi ħsarat f'Marzu 2022 matul l-invażjoni Russa tal-Ukrajna, meta diversi nirien ġie kkawżat mill-ġlied fl-inħawi.

Fawna

Il-fawna tar-riżerva tinkludi madwar 3,500 speċi. Fosthom hemm diversità kbira ta' insetti, b'kollox madwar 2,200 speċi, araknidi — 168 speċi, u molluski — 65 speċi. Il-vertebrati huma rrappreżentati b'462 speċi, inkluż varjetà kbira ta' għasafar — ġew irreġistrati 304 speċijiet. Hemm disa' speċijiet ta' rettili u b'hekk din ir-riżerva għandha fost l-ikbar bijodiversità fir-riżervi Ukreni. Bis-saħħa tas-snin kollha ta' osservazzjoni fl-ibħra tar-riżerva, ġew irreġistrati 83 speċi ta' ħut, jew madwar 50 % tal-ispeċijiet ta' ħut fil-Baħar l-Iswed kollu. Fost il-mammiferi terrestri hemm 50 speċi, filwaqt li fost il-fawna marittima hemm tliet speċijiet.