Monasteru ta' Ferapontov

Il-Monasteru ta' Ferapontov (bir-Russu: Ферапонтов монастырь), fir-reġjun ta' Vologda tar-Russja, jitqies bħala wieħed mill-iżjed eżempji puri tal-arti Medjevali Russa, u b'hekk tniżżel fil-lista tas-Siti ta' Wirt Dinji tal-UNESCO fis-sena 2000.

Veduta tal-Monasteru ta' Ferapontov mill-ajru.

Storja

Il-monasteru ġie stabbilit minn San Ferapont fl-1398 fit-territorju inospitabbli tat-Tramuntana tar-Russja, fil-Lvant mill-Monasteru ta' Kirillo-Belozersky, li ngħata dak l-isem għall-patri li mbagħad sar San Kirill ta' Beloozero. Il-fama tal-monasteru bdiet tinfirex taħt id-dixxiplu ta' Kirill, San Martinjan, li mbagħad sar il-patri superjur tal-Lavra ta' Troitse-Sergiyeva fl-1447.

Saħansitra wara mewt Martinjan, il-monasteru tiegħu ġie protett u privileġġat mill-membri tal-familja ta' Ivan III. L-iżjed struttura antika, il-Katidral tan-Natività tal-Madonna (1490), inbniet bil-brikks mill-mastri ta' Rostov. Din il-binja hija l-iżjed waħda ppreservata mit-tliet katidrali li nbnew fis-snin 90 tas-seklu 15 fit-Tramuntana tar-Russja. Fuq ġewwa, il-ħitan kollha huma miksija b'affreski ta' valur inestimabbli li ġew impittrin mill-pittur Medjevali Dijoniżju. Din il-knisja hija l-unika knisja Medjevali Russa li għadha teżisti bil-ħitan ta' ġewwa mpittrin minn fuq s'isfel.

Matul is-snin 30 tas-seklu 16, ġew miżjuda strutturi oħra bħat-teżor, refettorju u l-knisja unika tal-Annunzjata b'kampnar. Dak iż-żmien il-monasteru kellu privileġġi speċjali li ngħatawlu minn Ivan it-Terribbli, u kellu fis-sjieda tiegħu xi 60 villaġġ fil-qrib. Il-ksar stess spiss żar il-monasteru bħala pellegrin.

Fi Żmien il-Għawġ, il-monasteru ġie attakkat mill-Pollakki. Meta mbagħad ġie rrestawrat, l-aħħar binjiet tiegħu — il-knisja qisha tinda ta' San Martinjan (1641), knisja b'qisha żewġ tined (1650), u kampnar (1680) — ġew miżjuda mal-kumpless. L-arloġġi tal-kampnar (1638) jingħad li huma l-eqdem fir-Russja.

Filwaqt li l-monasteru gradwalment tilef l-importanza reliġjuża li kellu, beda jintuża bħala post tal-eżilju għal diversi membri distinti tal-kleru, fosthom il-Patriarka Nikon. Il-monasteru ġie abolit mill-Imperatur Pawlu fl-1798, ġie stabbilit bħala kunvent fl-1904, ingħalaq mill-Bolxeviki 20 sena wara, u ġie kkonvertit f'mużew fl-1975. Il-mużew jikkostitwixxi parti mill-Park Nazzjonali ta' Russky Sever (it-Tramuntana tar-Russja) mill-1991.

Minn Jannar 2013, ritratti tal-monasteru u tat-territorju tiegħu saru disponibbli fuq Google Street View.

Sit ta' Wirt Dinji

Il-Monasteru ta' Ferapontov ġie ddeżinjat bħala Sit ta' Wirt Dinji tal-UNESCO fis-sena 2000.

Il-valur universali straordinarju tas-sit ġie rrikonoxxut abbażi ta' żewġ kriterji tal-għażla tal-UNESCO: il-kriterju (i) "Rappreżentazzjoni ta' kapulavur frott il-kreattività tal-bniedem"; u l-kriterju (iv) "Eżempju straordinarju ta' tip ta' bini, ta' grupp ta' siti jew ta' pajsaġġ arkitettoniku jew teknoloġiku li joħroġ fid-dieher stadju/i sinifikanti fl-istorja tal-bniedem".

Gallerija

• 
•