Mario Serracino Inglott
Mario Serracino Inglott (1934–2007) kien lingwista u surmast taċ-ċess.
| Mario Serracino Inglott | |
|---|---|
| Ħajja | |
| Twelid | Bormla, 4 Novembru 1934 |
| Nazzjonalità | Malta |
| Mewt | 22 Settembru 2007 |
| Familja | |
| Missier | Erin Serracino Inglott |
| Edukazzjoni | |
| Lingwi | Malti |
| Okkupazzjoni | |
| Okkupazzjoni |
għalliem tal-iskola lessikografu chess master (en)  plejer taċ-ċess għalliem fl-università |
Huwa twieled Bormla fl-4 ta’ Novembru 1934. Missieru kien il-lingwista magħruf Erin Serracino Inglott. Mario attenda l-Kulleġġ San Alwiġi u l-Liċeo, wara studja fl-Università ta’ Oxford fejn iggradwar b'BA fl-ekonomija.[1]
Missieru kien mudell ewlieni għalih. Mario segwa lil Erin fl-imħabba tiegħu lejn il-lingwa Maltija u ċ-ċess. Huwa sar ċampjin taċ-ċess ta’ Malta fl-1947 fl-età ta’ 12-il sena. Eventwalment beda jieħu sehem f’tournaments internazzjonali taċ-ċess, fosthom dawk fl-Italja u l-Jugoslavja fl-1957. Għal ħafna snin serva bħala president tal-Malta Chess Association.[2] Kien ukoll l-ewwel Malti li ġie rikonoxxut mill-Federazzjoni Internazzjonali taċ-Ċess (FIDE) bħala arbitru internazzjonali taċ-ċess.[3]
Fl-1953 kien impjegat bħala skrivan fil-Malta Dockyard iżda sar impjegat taċ-ċivil sentejn wara. Fl-1963 ġie trasferit għal Malta House f’Londra fi żmien meta l-pajjiż kien fl-aħħar stadji li jingħata l-indipendenza mill-Gran Brittanja. Matul iż-żmien li qatta’ Londra, kiteb diversi poeżiji u stejjer qosra bil-Malti u bl-Ingliż. Meta mar lura Malta, ħadem għad-Dipartiment tal-Industrija u wara l-Ministeru tal-Edukazzjoni, fejn sar l-amministratur anzjan fid-Dipartiment tal-Isport. Fl-1980 huwa kkoordina l-Olimpjadi taċ-Ċess f’Malta – l-akbar edizzjoni sa dak iż-żmien.[4] Irtira miċ-ċivil fl-1985. Ftit wara sar għalliem fil-Kulleġġ Stella Maris.
Kien membru tal-Akkademja tal-Malti u serva bħala viċi-president tagħha għal numru ta’ snin.[5] L-imħabba tiegħu għall-ilsien Malti saret l-aktar evidenti fl-1983, meta beda jeditja l-volumi posthumi tal-kappulavur ta’ missieru Il-Miklem Malti, li jibqa’ l-aktar studju estensiv tal-lessiku Malti. Pubblikazzjonijiet tiegħu stess jinkludu Storja taċ-Ċess f’Malta bejn l-1880 – 1990 u d-dizzjunarju u teżawru tiegħu stess Diżżjunarju Malti, ippubblikat mill-Merlin Library.[6]
Mario Serracino Inglott iżżewweġ lil Joan Antida Fsadni fl-1960 u flimkien kellhom tifla jisimha Lara.[1]
Miet fit-22 ta’ Settembru 2007 fl-età ta’ 72 sena.[1]
Referenzi
immodifika- ^ a b ċ "Author Mario Serracino Inglott passes away at 72". Times of Malta (bl-Ingliż). Miġbur 2023-04-15.
- ^ "History - Malta Chess Federation" (bl-Ingliż). 2021-01-06. Miġbur 2023-04-15.
- ^ "Mario Serracino-Inglott dies at 73". www.olimpbase.org. Miġbur 2023-04-15.
- ^ Thake, Contrad (2021-02-04). "Commemorating the Malta Chess Olympiads 1980 (Chess Corner in the Times of Malta) - Malta Chess Federation" (bl-Ingliż). Miġbur 2023-04-15.
- ^ "Work Of Mario Serracino Inglott commemorated - The Malta Independent". www.independent.com.mt. Miġbur 2023-04-15.
- ^ Reljic, Teodor (2007-09-30). "The Maltese language loses one of its heavyweights - MaltaToday". archive.maltatoday.com.mt (bl-Ingliż). Miġbur 2023-04-15.