Gwerra Totali huwa kunflitt bla ebda limitu fejn pajjiż belliġerenti ikun ingaġġat f'mobiliżazzjoni totali ta' kull riżorsa li tista' tintuża, tkun hi umana, industrijali, agrikulturali, militari, naturali, jew teknoloġika bl-għan li jitkisser jew li tispiċċa kull possibiltà ta' reżistenza ta' l-għadu. Il-prattika ta' gwerra totali ilha tintuża għal sekli, imma kien biss fl-aħħar tas-seklu dsatax li l-gwerra totali ġiet identifikata mill-ħassieba bħala klassi separata ta' gwerra. Fi gwerra totali, hemm inqas differenza bejn ġellieda u ċivili meta kkumparata ma' kunflitti oħra, għax kull persuna minn pajjiż partikulari, ċivili jew suldati, jistgħu jiġu kkunsidrati bħala belliġerenti u allura kontributuri fl-isforz belliku.