Frank Drake

astronomu u astrofiżiku Amerikan (1930-2022)

Frank Donald Drake (twieled fit-28 ta' Mejju 1930 – miet fit-2 ta' Settembru 2022) kien astronomu u astrofiżiku Amerikan. Drake wettaq studji bir-radju sinifikanti tal-pjaneti u kien involut b'mod notevoli fl-ewwel tfittxija għal intelliġenza ekstraterrestri, inkluż fl-ewwel tentattivi ta' osservazzjoni ta' detezzjoni tal-komunikazzjoni ekstraterrestri fl-1960 fil-Proġett Ozma, u żviluppa l-ekwazzjoni ta' Drake, bħala l-ħallieq tal-messaġġ ta' Arecibo, kodifikazzjoni diġitali ta' deskrizzjoni astronomika u bijoloġika tad-Dinja u l-ħlejjaq li jgħixu fiha għal trażmissjoni fl-univers, u bħala wieħed mill-ewwel fiduċjarji tal-Istitut SETI.[1]

Frank Drake
Ħajja
Twelid Chicago, 28 Mejju 1930
Nazzjonalità Stati Uniti tal-Amerka
Mewt Aptos, 2 Settembru 2022
Familja
Ulied
Edukazzjoni
Alma mater Università ta' Harvard
Università ta' Cornell
South Shore High School (en) Translate
Direttur tat-teżi Cecilia Payne Gaposchkin (en) Translate
Bart Bok (en) Translate
Thomas Gold (en) Translate
Studenti dottorali Donald C. Backer (en) Translate
Lingwi Ingliż
Okkupazzjoni
Okkupazzjoni astronomu
għalliem fl-università
astrofiżiku
Impjegaturi University of California, Santa Cruz (en) Translate
Premjijiet
Sħubija Akkademja Nazzjonali tax-Xjenzi
Akkademja Amerikana tal-Arti u tax-Xjenzi

Drake jitqies bħala wieħed mill-pijunieri tal-qasam modern tat-tfittxija għall-intelliġenza ekstraterrestri flimkien ma' Giuseppe Cocconi, Philip Morrison, Iosif Shklovsky u Carl Sagan.

Ħajja bikrija u edukazzjoni immodifika

Imwieled fit-28 ta' Mejju 1930, f'Chicago, Illinois, l-Istati Uniti[2], Drake wera interess minn kmieni fl-elettronika u fil-kimika. Drake kkunsidra għall-ewwel darba l-possibbiltà tal-eżistenza tal-ħajja fuq pjaneti oħra meta kellu tmien snin, wara li sostna li jekk iċ-ċivilizzazzjoni umana kienet riżultat każwali, allura ċivilizzazzjonijiet oħra jaf jeżistu xi mkien ieħor fl-univers.[3]

Huwa attenda l-Università ta' Cornell permezz ta' borża ta' studju mill-Korp tat-Taħriġ tal-Uffiċjali ta' Riżerva tal-Flotta Navali. Hemmhekk beda jistudja l-astronomija. L-ideat tiegħu dwar il-possibbiltà tal-ħajja ekstraterrestri ġew imsaħħa permezz ta' lekċer mill-astrofiżiku Otto Struve fl-1951. Wara li kiseb Baċellerat fil-fiżika tal-inġinerija, Drake għal żmien qasir għamilha ta' uffiċjal tal-elettronika fuq il-bastiment militari USS Albany. Imbagħad kompla l-istudji tiegħu fl-Università ta' Harvard mill-1952 sal-1955 fejn kiseb Masters u Dottorat fl-astronomija. Huwa ħejja t-teżi tad-dottorat taħt it-tmexxija ta' Cecilia Payne-Gaposchkin.

Karriera immodifika

Drake beda l-karriera tiegħu billi wettaq riċerka radjoastronomika planetari fl-1958-1963 fl-Osservatorju Radjoastronomiku Nazzjonali (NRAO) f'Green Bank, il-Punent ta' Virginia, fejn kien minn ta' quddiem fix-xogħol ta' konverżjoni tal-Osservatorju ta' Arecibo f'faċilità radjoastronomika. Permezz tar-radjoteleskopju f'Green Bank, Drake mmappja ċ-ċentru tal-galassja tat-Triq ta' Sant'Anna għall-ewwel darba, skopra l-jonosfera u tal-manjetosfera tal-pjaneta Ġove, u għamel osservazzjonijiet sinifikanti tal-atmosfera tal-pjaneta Venere.[4] F'April 1959, Drake kiseb l-approvazzjoni mid-direttur tal-NRAO għall-Proġett Ozma għat-tfittxija ta' komunikazzjoni ekstraterrestri bir-radju.[5] Inizjalment, ġie maqbul li l-proġett jinżamm sigriet minħabba l-biża' li jiġi rridikolat. Madankollu, Drake ġie mġiegħel jippubbliċizza x-xogħol tiegħu wara li Cocconi u Morrison ippubblikaw dokument f'Nature f'Settembru 1959 bit-titlu "Tfittxija għal Komunikazzjoni Interstellari".[6] Drake beda jieħu kejliet fl-1960, permezz tar-radjoteleskopju ta' 26 metru tal-NRAO, sabiex ifittex għal xi sinjali possibbli mis-sistemi ta' stilel ta' Tau Ceti u Epsilon Eridani. Ma ġie individwat l-ebda sinjal ekstraterrestri u l-proġett intemm f'Lulju 1960. Madankollu, il-Proġett Ozma wassal biex l-istudent universitarju Carl Sagan jikkuntattja lil Drake, u b'hekk bdiet kollaborazzjoni tul il-ħajja kollha bejn iż-żewġ xjenzati.

Fl-1961, Drake ħareġ bl-ekwazzjoni ta' Drake biex jagħmel stima tal-għadd ta' ċivilizzazzjonijiet ekstraterrestri li jistgħu jkunu individwabbli fil-galassja tat-Triq ta' Sant'Anna. L-ekwazzjoni ta' Drake sussegwentement saret magħrufa bħala "t-tieni l-iżjed ekwazzjoni famuża fix-xjenza", wara l-ekwazzjoni E=mc2 ta' Albert Einstein.[7]

Fl-1963 għal żmien qasir Drake kien il-kap tas-sezzjoni tax-Xjenza Lunari u Planetarja fil-Laboratorju tal-Propulsjoni bil-Ġettijiet, qabel ma reġa' lura fl-Università ta' Cornell fl-1964 fejn inħatar bħala Professur tal-Astronomija ta' Goldwin Smith fl-1976. Fl-1972, Drake kien kodisinjatur tal-plakka ta' Pioneer ma' Carl Sagan u Linda Salzman Sagan. Il-plakka kienet l-ewwel messaġġ fiżiku li ntbagħat fl-ispazju u li kien maħsub biex jinftiehem minn kwalunkwe forma ta' ħajja ekstraterrestri li tkun biżżejjed avvanzata teknoloġikament biex forsi tinterċettah.[8] Fl-1974, Drake kiteb il-messaġġ ta' Arecibo, l-ewwel messaġġ interstellari trażmess deliberatament mid-Dinja.[9] Iktar 'il quddiem Drake kien direttur tekniku, flimkien ma' Sagan u Ann Druyan, fil-ħolqien tal-Voyager Golden Record li ttella' fuq l-inġenji spazjali Voyager 1 u 2.[10] Drake kien direttur assoċjat taċ-Ċentru għar-Radjofiżika u r-Riċerka Spazjali tal-Università ta' Cornell, bħala direttur tal-Osservatorju ta' Arecibo mill-1966 sal-1968, u direttur taċ-Ċentru Nazzjonali tal-Astronomija u l-Jonosfera (NAIC), inklu' il-faċilità ta' Arecibo, mill-istabbiliment tiegħu fl-1971 sal-1981.

Fl-1984, Drake telaq mill-Università ta' Cornell u sar kap tax-Xjenzi Naturali fl-Università ta' California f'Santa Cruz. Wara li telaq minn dan ir-rwol fl-1988, huwa baqa' professur u kien ukoll il-President tal-Bord ta' Fiduċjarji tal-Istitut SETI wara l-istabbiliment tiegħu fl-1984, kif ukoll direttur taċ-Ċentru ta' Carl Sagan tiegħu għall-Istudju tal-Ħajja fl-Univers. Drake kien il-President tas-Soċjetà Astronomika tal-Paċifiku mill-1988 sal-1990. Mill-1989 sal-1992, Drake kien il-President tal-Bord tal-Fiżika u tal-Astronomija għall-Kunsill Nazzjonali tar-Riċerka.[11] Huwa rtira mit-tagħlim fl-1996 iżda baqa' professur emeritu tal-astronomija u l-astrofiżika fl-Università ta' California. Fl-2010, Drake ma baqax iktar direttur taċ-Ċentru ta' Carl Sagan għall-Istudju tal-Ħajja fl-Univers iżda baqa' parti mill-bord tal-fiduċjarji tal-Istitut SETI.[12]

Ħajja personali immodifika

Fost il-passatempi ta' Drake kien hemm il-qtugħ u l-illostrar tal-ħaġar prezzjuż u l-kultivazzjoni tal-orkidej.[13]

Huwa kellu ħamest itfal, fosthom il-ġurnalista xjentifika Nadia Drake.[14]

Drake miet fit-2 ta' Settembru 2022, f'daru f'Aptos, California, minn kawżi naturali meta kellu 92 sena.[15][16]

Unuri immodifika

  • L-asterojde 4772 Frankdrake issemmiet għalih.[17]
  • Elett fl-Akkademja Nazzjonali tax-Xjenzi fl-1972.[18]
  • Elett fl-Akkademja Amerikana tal-Arti u x-Xjenzi fl-1974.[19]
  • Premju ta' Drake tal-2001 mill-Istitut SETI.
  • Premju tal-Pijunier Spazjali tal-2018 tas-Soċjetà Spazjali Nazzjonali għax-Xjenza u l-Inġinerija.[20]

Referenzi immodifika

  1. ^ Overbye, Dennis (2022-09-05). "Frank Drake, Who Led Search for Life on Other Planets, Dies at 92" (bl-Ingliż). Miġbur 2022-09-07.
  2. ^ "Frank Drake, pioneer in the search for alien life, dies at 92". Science (bl-Ingliż). 2022-09-02. Miġbur 2022-09-08.
  3. ^ "Frank Drake - Biography, Facts and Pictures" (bl-Ingliż). Miġbur 2022-09-08.
  4. ^ "Dr. Frank Drake". ISDC 2018 (bl-Ingliż). Miġbur 2022-09-08.
  5. ^ "Frank Donald Drake". Oxford Reference (bl-Ingliż). Miġbur 2022-09-08.
  6. ^ Cocconi, Giuseppe; Morrison, Philip (1959). "Searching for Interstellar Communications". Nature. 184 (4690): 844–846.
  7. ^ Stephens, Tim. "Pioneering radio astronomer Frank Drake dies at 92". UC Santa Cruz News (bl-Ingliż). Miġbur 2022-09-08.
  8. ^ Sagan, Carl; Sagan, Linda Salzman; Drake, Frank (February 25, 1972). "A Message from Earth". Science. 175 (4024): 881–884.
  9. ^ "Cosmic Search Issue 07 Page 2 - Putting Our Best Signal Forward by Leonard David". bigear.org. Miġbur 2022-09-08.
  10. ^ "Cornellians celebrate the Voyagers' historic Golden Record". Cornell Chronicle (bl-Ingliż). Miġbur 2022-09-08.
  11. ^ "Professor Frank D. Drake". www.ucolick.org. Miġbur 2022-09-08.
  12. ^ published, Denise Chow (2010-06-14). "SETI Institute Names New Chief Alien Life Hunter". Space.com (bl-Ingliż). Miġbur 2022-09-08.
  13. ^ Billings, Lee (October 3, 2013). Five Billion Years of Solitude: The Search for Life Among the Stars (1st ed.). New York: Penguin Group. ISBN 9781617230066.
  14. ^ Broad, William J. (1985-04-10). "EAVESDROPPERS LISTEN FOR COSMIC HELLO" (bl-Ingliż). Miġbur 2022-09-08.
  15. ^ Overbye, Dennis (2022-09-05). "Frank Drake, Who Led Search for Life on Other Planets, Dies at 92" (bl-Ingliż). Miġbur 2022-09-08.
  16. ^ Timmer, John (2022-09-02). "Frank Drake, astronomer famed for contributions to SETI, has died". Ars Technica (bl-Ingliż). Miġbur 2022-09-08.
  17. ^ "IAU Minor Planet Center". www.minorplanetcenter.net. Miġbur 2022-09-08.
  18. ^ "Frank D. Drake". www.nasonline.org. Miġbur 2022-09-08.
  19. ^ "Frank Donald Drake". American Academy of Arts & Sciences (bl-Ingliż). Miġbur 2022-09-08.
  20. ^ "National Space Society to Present Space Pioneer Award to SETI Astronomer Frank Drake" (bl-Ingliż). 2018-04-16. Miġbur 2022-09-08.